Ўзбекистон Ташқи ишлар вазирлиги хорижга чиқувчи фуқароларни қалбаки ПЗР-тест маълумотномаларидан огоҳлантириб, улардан бу иш бўйича «ёрдамлашиш» борасидаги таклифларга кўнмасликни сўради.
Таъкидланишича, электрон оммавий ахборот воситаларида Ўзбекистон фуқароларининг чет эл мамлакатлари халқаро аэропортларига боришлари билан хорижда даволаниш учун касаллик тўғрисидаги сохта ҳужжатларни ҳамда коронавирусни аниқлаш учун ўтказилган ПЗР-тест манфий натижаси кўрсатилган қалбаки маълумотномаларни тақдим қилаётганликларига оид ҳолатлар ҳақидаги хабарлар тарқалмоқда.
Қайд этилишича, мазкур ҳолат фуқаролар хорижий мамлакат ҳудудига киритилмаслиги учун асос ҳисобланади. Шунингдек, қалбаки ҳужжатлар Ўзбекистоннинг дипломатик ваколатхоналари ва консуллик муассасалари томонидан фуқароларга консуллик-ҳуқуқий ёрдам кўрсатиш жараёнини ҳам қийинлаштиради.
Шу муносабат билан, Ташқи ишлар вазирлиги Консуллик-ҳуқуқий департаменти хорижий мамлакатларга боришни режалаштираётган Ўзбекистон фуқароларидан бегона шахсларнинг қалбаки тиббий маълумотнома ва бошқа ҳужжатларни тайёрлаб беришда «ёрдамлашиш» борасидаги таклифларига кўнмасликларини сўради.
Вазирлик, шу билан бирга, чет элга сафарга чиқишдан олдин ўша мамлакатда жорий қилинган чеклов чоралари ва талаблар билан синчиклаб танишиб чиқишни тавсия этади.
Аввалроқ Тошкент халқаро аэропортида сохта ПЗР-тест маълумотномасини сотаётган гуруҳ ушлангани ҳақида хабар берилганди.
Изоҳ (0)