Конгресс биносига ҳужум уюштирган шахслар «АҚШ ҳукуматининг сайланган мансабдорлар шахсларини қўлга олиб, ўлдирмоқчи бўлган». Бу ҳақда Аризона округи прокурорининг QAnon «шомони» Жейкоб Энтони Ченслини ҳибсда ушлаб туриш муддатини узайтириш борасидаги илтимосномасида сўз боради, деб ёзади Meduza.
The Washington Post эътибор қаратган илтимосномада қайд этилишича, ҳужум иштирокчилари мақсади Ченслининг хатти-ҳаракатлари билан ҳам тасдиқланиб турибди. У АҚШ вице-президенти, Сенат раиси ҳисобланган Майк Пенснинг столида «Адолат ўрнатилади, бу фақат вақтга боғлиқ» дея ёзув битилган кичкина хат қолдирган.
Ченсли ўзининг хати бирор хавф туғдиришини рад этган, бироқ айблов бунга қўшилмаган.
Аризоналик 33 ёшли Жейкоб Энтони Ченсли «QAnon-шомон» номи билан танилган бўлиб, у Капитолийга уюштирилган ҳужумнинг асосий иштирокчиларидан бирига айланган. У шохлари бор пахмоқ қалпоқда бинога бостириб кирган, юзлари эса Америка байроғи ранглари билан бўялган эди. Ҳужумдан сўнг Ченсли безорилик ва зўравонлик билан давлат муассасасига бостириб кириш айблови билан ҳибсга олинган эди.
Мавзуга доир: АҚШ ФҚБ: Жо Байденнинг инаугурацияси арафасида норозилик намойишлари уюштирилиши мумкин
Ҳуқуқ-тартибот органларининг штурм вақтидаги хатти-ҳаракатлари жамоатчилик норозилигига сабаб бўлди, хусусан, Конгресс қуйи палатаси спикери Нэнси Пелоси ҳам уларни кескин танқид қилди. Associated Press маълумотларига кўра, тартибсизликлар юз беришидан бир неча кун аввал Капитолий полициясига кўмак сифатида Миллий гвардия жангчилари ва ФҚБ агентларини ажратиш таклиф қилинган, бироқ полиция бу имкониятдан фойдаланмаган. Тартибсизликлардан сўнг Капитолий полицияси раҳбари истеъфо берди.
Изоҳ (0)