Туркия президенти Ражаб Тоййиб Эрдўғон 14 январь куни ОАВ иштирокида Хитойнинг CoronaVac компанияси томонидан ишлаб чиқарилган коронавирус вакцинасининг биринчи дозаси билан эмланди, дея хабар бермоқда Anadolu агентлиги.
Президентни эмлаш жараёни Анқара касалхонасидан тўғридан-тўғри эфирда намойиш этилди.
Эрдўғоннинг таъкидлашича, Туркияда COVID-19 вакцинасини қабул қилган тиббиёт ходимлари сони 300 мингга яқинлашди.
«Муваффақиятли эмлаш дастуримиз доирасида 254 минг соғлиқни сақлаш ходими биринчи дозада эмланди. Мен ҳам уларга қўшилиб эмландим», – деди Туркия раҳбари.
Президент Эрдўғон мамлакатнинг барча аҳолисини иложи борича тезроқ эмлашга умид билдирди. Унинг таъкидлашича, Туркия яна 25-30 миллион дозада коронавирус вакцинасини сотиб олади.
Давлат раҳбари билан бирга ҳукмрон Адолат ва тараққиёт партияси раҳбарияти аъзолари ҳам эмланган.
Шунингдек, президент мамлакат сиёсатчиларини коронавирусга қарши эмлаш кампаниясини ривожлантиришга ҳисса қўшишга чақирди.
Аввалроқ Туркия президенти Ражаб Тоййиб Эрдўғон Telegram’да расмий каналини очгани ҳамда мамлакатда Хитой вакцинаси билан эмлаш қачон бошланишини маълум қилгани ҳақида хабар берилганди.
Изоҳ (0)