O‘zbekiston Prezidenti Shavkat Mirziyoyevning Koreya Respublikasiga tashrifi davomida erishilgan kelishuvlar bo‘yicha hujjatlar imzolash marosimi bo‘lib o‘tdi. Bu haqda O‘zbekiston Prezidentining rasmiy veb-saytida ma’lum qilindi.

Foto: O‘zbekiston Prezidentining Janubiy Koreyaga davlat tashrifini yoritish bo‘yicha matbuot markazi

Shavkat Mirziyoyev va Janubiy Koreya prezidenti Mun Chje In strategik sheriklik munosabatlarini har tomonlama chuqurlashtirish to‘g‘risida qo‘shma bayonotni imzoladi.

Bundan tashqari, quyidagi hujjatlar imzolandi:

  • O‘zbekiston Bandlik va mehnat munosabatlari vazirligi va Janubiy Koreya Inson resurslarini boshqarish vazirligi o‘rtasida hamkorlik memorandumi, ikki mamlakat adliya vazirliklari o‘rtasida hamkorlik memorandumi;
  • O‘zbekiston Tashqi savdo vazirligi hamda Janubiy Koreya Savdo, sanoat va energetika vazirliklari o‘rtasida O‘zbekistonda Milliy elektron savdo platformasini joriy qilish bo‘yicha hamkorlik bitimi;
  • O‘zbekistonning Jahon savdo tashkilotiga qo‘shilishi bo‘yicha hamkorlik to‘g‘risidagi hukumatlararo memorandum;
  • ikki davlat tashqi ishlar vazirliklari o‘rtasida 2018–2020-yillarga mo‘ljallangan hamkorlik dasturi;
  • O‘zbekiston Iqtisodiyot vazirligi bilan Koreya Strategiya va moliya vazirligi o‘rtasida bilimlar almashinuvi dasturi bo‘yicha anglashuv memorandumi;
  • 2018–2020-yillarda iqtisodiy taraqqiyot va hamkorlik jamg‘armasi kreditlari bo‘yicha hukumatlararo hadli kelishuv;
  • O‘zbekiston tiklanish va taraqqiyot fondi bilan Koreya eksport-import banki o‘rtasida moliyaviy hamkorlik to‘g‘risida kelishuv.

Jami 60 dan ortiq muhim hujjat imzolandi.