Вазн ташлаш ва чиройли қоматга эга бўлиш мақсадида кўпинча мазали егуликлардан ўзимизни тийишимизга тўғри келади. Аммо парҳез ҳамиша ҳам севимли десертлардан буткул воз кечиш кераклигини билдирмайди. Шунчаки фойдали альтернативни танлашни билиш ва уни уй шароитида тайёрлаш керак холос.
Сули ёрмасидан ун қўшмай туриб ҳам тайёрласа бўладиган печенье
Сули ёрмасида қоринни узоқ вақт тўқ тутадиган мураккаб углеводлар, B гуруҳи витаминлари ва микроэлементлар мўл бўлгани сабаб ҳам ундан тайёрланган печенье энг фойдали ва мазали десертлардан бири ҳисобланади. Ушбу печеньени тайёрлаш учун 4 дона банан, 2 стакан сули ёрмаси, ёнғоқ, шунингдек, асал керак бўлади. Тайёрлаш жараёнини бананни бўтқа ҳолига келтиришдан бошланг. Кейин қолган маҳсулотларни қўшиб аралаштиринг ва 180 даража печда пишириб олинг.
Чиа пудинг
Қомати гўзал бўлиши ҳамда балансли овқатланишга риоя қилишни истовчилар учун чиа уруғи энг яхши маҳсулот ҳисобланади. Унинг таркибида кўп миқдорда организм саломатлиги учун фойдали бўлган витамин, минерал ва микроэлементлар мавжуд. Чиа уруғини кокос сути билан аралаштириб, тунда музлаткичга қўйиб қўйинг. Тонгда аралашмага блендерда пюре ҳолига келтирилган мева ва резаворлар қўшинг.
Кокос ва хурмодан тайёрланадиган шарчалар
Ушбу ширинликка шакар ва ҳайвонлардан олинадиган маҳсулотлар қўшилмагани сабаб веганлар учун ҳам айни муддао, аммо калория бой экани сабаб уни меъёрида истеъмол қилишга риоя қилиш керак. Тайёрлаш учун хурмони данагидан тозалаб, сувга бир неча соатга ивитиб қўйинг. Блендерга солинг ҳамда кокос қириндиси, долчин, чиа уруғи ва апельсин шарбати солинг. Барча маҳсулотларни блендерда аралаштиринг ва шарча ҳолига келтириб, музлаткичга қўйинг. Шарчалар устидан эритилган шоколад қуйишингиз ҳам мумкин.
Чизкейк
Чизкейк тамоман парҳезбоп бўлмаса ҳам бошқа ширинликлар билан солиштирилганда калорияси камлиги билан ўзига хос. Агар уй шароитида кам шакар ва маҳсулотларни назорат қилиб қўшилса янада фойдали бўлади. Ёғсиз печеньени майдалаб унга сариёғ аралаштиринг. Творогга қаймоқ, шакар ва ванилин қўшиб крем ҳолига келтиринг. Печенье устидан крем қуйинг ҳамда мевалар қўшиб безанг.
Кружка ичига солиб пиширса бўладиган кекс
Ушбу ширинлик кам калорияга эга эканлиги ва тез тайёрланиши билан ўзига хос. Бунинг учун 5 ош қошиқ сули ёрмасига бир дона тухум, бир қошиқ какао кукуни ҳамда 50 мл сут қўшиш керак. Аралашмани кружкага солинг ҳамда 5 дақиқага микротўлқинли печга қўйинг. Қарабсизки, мазали десерт тайёр.
Изоҳ (0)