Фото: 50 йилда биринчи марта қорга кўмилган Испания

Испанияда кучли ёмғир ва қор билан бирга кечаётган «Филомена» бўрони оқибатида тўрт киши ҳалок бўлди, дея хабар бермоқда Reuters. El Pais газетасининг ёзишича, ҳозир Испанияда сўнгги 50 йилдаги энг кучли қор бўрони кузатилмоқда — қор мамлакатнинг асосан марказий қисмида ёққан, соҳилбўйи ҳудудларида жала қуймоқда.

Ўнта провинцияда, жумладан, пойтахт Мадридда хавфнинг қизил даражаси эълон қилинган: йўллар ёпилган, жамоат транспорти тўхтаган, маданий ва спорт тадбирлари бекор қилинган. Давлат метеорология агентлиги вакили Жулиан Морсилонинг сўзларига кўра, келаси ҳафта ҳаво ҳарорати -10 даражагача пасайиб, хавфли музламалар юзага келиши мумкин.

Мадрид атрофида қор бўрони сабаб машинасида қолиб кетган 1,5 мингга яқин одам қутқарувчилар томонидан қутқарилган, одатда машиналар билан тўлиб тошган Гран-Виа кўчаси эса «чанғичилар кўчаси»га айланган. «Биз авваллари ҳеч қачон бундай воқеани кўрмагандик», — дейди 30 ёшли Маркос Reuters’га берган интервьюсида.