Foto: 50 yilda birinchi marta qorga ko‘milgan Ispaniya

Ispaniyada kuchli yomg‘ir va qor bilan birga kechayotgan “Filomena” bo‘roni oqibatida to‘rt kishi halok bo‘ldi, deya xabar bermoqda Reuters. El Pais gazetasining yozishicha, hozir Ispaniyada so‘nggi 50 yildagi eng kuchli qor bo‘roni kuzatilmoqda — qor mamlakatning asosan markaziy qismida yoqqan, sohilbo‘yi hududlarida jala quymoqda.

O‘nta provinsiyada, jumladan, poytaxt Madridda xavfning qizil darajasi e’lon qilingan: yo‘llar yopilgan, jamoat transporti to‘xtagan, madaniy va sport tadbirlari bekor qilingan. Davlat meteorologiya agentligi vakili Julian Morsiloning so‘zlariga ko‘ra, kelasi hafta havo harorati -10 darajagacha pasayib, xavfli muzlamalar yuzaga kelishi mumkin.

Madrid atrofida qor bo‘roni sabab mashinasida qolib ketgan 1,5 mingga yaqin odam qutqaruvchilar tomonidan qutqarilgan, odatda mashinalar bilan to‘lib toshgan Gran-Via ko‘chasi esa “chang‘ichilar ko‘chasi”ga aylangan. “Biz avvallari hech qachon bunday voqeani ko‘rmagandik”, — deydi 30 yoshli Markos Reuters’ga bergan intervyusida.