«Орангизда онам бўлсайди», «Дадамга ичирманглар», «Ёшлик бизни ташлаб кетади», «Жайра-жайра», «Дадамнинг мухлислари», «Маликам», «Уйга қуруқ қайтмасин эркак» каби юзлаб оммалашган қўшиқларнинг муаллифи, шоир Мирзо Карим уйсиз яшаётгани, оиласи ва фарзандлари билан ўн йиллардан буён ижара уйларда сарсон бўлиб юргани ҳақида шоир билан 2019 йилнинг ноябрь ойида интервью қилган эдик.

Фото: «Дарё»

Шоир Мирзо Карим «Дарё» мухбири Феруз Муҳаммадга берган интервьюсида 2020 йилнинг декабрь ойида 11 йиллик ижара азобидан қутулиб, шахсий уйига кўчиб ўтгани ҳақида интервью берди.

Ўн бир йилдан кўпроқ вақт мобайнида, етти мартадан кўпроқ ижара уйларда кўчиб яшаган эдик. Худога шукр, бошпанали, ватанли бўлдик, бундан оиламиз билан жуда хурсандмиз. Шу ишда хайрихоҳлик билдирган, ҳеч бўлмаса «Мирзо Каримнинг мушкули осон бўлсин», дея дуо қилганлардан ҳамиша миннатдорман, уларнинг хизматларидаман.

Ёзувчи ва шоирларга ажратилган уйдан бизнинг ҳам насибамиз борлигидан хурсандмиз.

Янги уйда кўчиб келгач, қалбимда шукроналик ҳис қилиб, ўтган кунларни сарҳисоб қилиб, ўйлаб бошладим. Баъзан ўйлаб қоламан, бизни балки ижаралар машҳур қилганмикан, деган хаёллар ҳам келади.

Аввало ижарама-ижара юрган одам қаерга кўчиб боради, одам яшамаётган жойга боради. Уйда одам яшамадими у уйдан фаришта қочади, файз кетади, ҳашаротлар босиб кетади. Бир уйга борсак, ҳашаротлар жуда кўпайиб кетган экан. У уйни дорилаб, тозаласак ҳам яшаш имконияти бўлмади. Бир ҳафта ўша ерда яшаб, кейин яна бошқа жойга кўчишга мажбур бўлганмиз.

Жамики ижарада яшаётган дўстларим, қадрдонларим, албатта, уйингиз бўлади. Фақат сабр билан яхши кунларни кутиб, ҳаракат қилиш керак.

Дўстим, хизматдошим собиқ Фарғона вилояти ҳокими Шуҳрат Ғаниев биринчилардан бўлиб ёрдам қўлини чўзди. Айтманг дейишган, аммо айтаман. Қўқонлик Илҳомжон акам, мусофирчиликда юрибди сўхлик Собиржон исмли укамиз, жамики мусофирчиликда юрган инсонларга раҳмат айтмоқчиман.

Аслида райҳон билан тушган суратимдан кейин ҳаммаси бошланиб кетганди. Шоира Малика Салимова, Малика Майя, Абдумалик укамиз, Сундар Қорабоев, Абдувоҳид Сувонов, яйпанлик укамиз Субҳониддин, Собиржон, банкда ишлайдиган укамиз Отабек ва яна кўплаб инсонларга миннатдорчилик билдираман. Балки, кимларнингдир исмлари эсимдан чиқиб қолган бўлса, узр сўрайман. Уларнинг барчасига раҳмат айтмоқчиман.

Буни айтиб ўтаман дея кўнглимга тугиб қўйганман. Санъаткорлар ичида Хуршидбек Расулов ҳамда укалари Жаҳонгир Расулов ёрдам қилишди. Укамиз Улуғбек Раҳматуллаев, Қиличбек Мадалиев, Яҳёбек Мўминов ёрдамларини аяшмади.

Мирзо Карим, Ўзбекистон Ёзувчилар уюшмаси аъзоси, шоир