“Orangizda onam bo‘lsaydi”, “Dadamga ichirmanglar”, “Yoshlik bizni tashlab ketadi”, “Jayra-jayra”, “Dadamning muxlislari”, “Malikam”, “Uyga quruq qaytmasin erkak” kabi yuzlab ommalashgan qo‘shiqlarning muallifi, shoir Mirzo Karim uysiz yashayotgani, oilasi va farzandlari bilan o‘n yillardan buyon ijara uylarda sarson bo‘lib yurgani haqida shoir bilan 2019-yilning noyabr oyida intervyu qilgan edik.
Shoir Mirzo Karim “Daryo” muxbiri Feruz Muhammadga bergan intervyusida 2020-yilning dekabr oyida 11 yillik ijara azobidan qutulib, shaxsiy uyiga ko‘chib o‘tgani haqida intervyu berdi.
O‘n bir yildan ko‘proq vaqt mobaynida, yetti martadan ko‘proq ijara uylarda ko‘chib yashagan edik. Xudoga shukr, boshpanali, vatanli bo‘ldik, bundan oilamiz bilan juda xursandmiz. Shu ishda xayrixohlik bildirgan, hech bo‘lmasa “Mirzo Karimning mushkuli oson bo‘lsin”, deya duo qilganlardan hamisha minnatdorman, ularning xizmatlaridaman.Yozuvchi va shoirlarga ajratilgan uydan bizning ham nasibamiz borligidan xursandmiz.
Yangi uyda ko‘chib kelgach, qalbimda shukronalik his qilib, o‘tgan kunlarni sarhisob qilib, o‘ylab boshladim. Ba’zan o‘ylab qolaman, bizni balki ijaralar mashhur qilganmikan, degan xayollar ham keladi.
Avvalo ijarama-ijara yurgan odam qayerga ko‘chib boradi, odam yashamayotgan joyga boradi. Uyda odam yashamadimi u uydan farishta qochadi, fayz ketadi, hasharotlar bosib ketadi. Bir uyga borsak, hasharotlar juda ko‘payib ketgan ekan. U uyni dorilab, tozalasak ham yashash imkoniyati bo‘lmadi. Bir hafta o‘sha yerda yashab, keyin yana boshqa joyga ko‘chishga majbur bo‘lganmiz.
Jamiki ijarada yashayotgan do‘stlarim, qadrdonlarim, albatta, uyingiz bo‘ladi. Faqat sabr bilan yaxshi kunlarni kutib, harakat qilish kerak.
Do‘stim, xizmatdoshim sobiq Farg‘ona viloyati hokimi Shuhrat G‘aniyev birinchilardan bo‘lib yordam qo‘lini cho‘zdi. Aytmang deyishgan, ammo aytaman. Qo‘qonlik Ilhomjon akam, musofirchilikda yuribdi so‘xlik Sobirjon ismli ukamiz, jamiki musofirchilikda yurgan insonlarga rahmat aytmoqchiman.
Aslida rayhon bilan tushgan suratimdan keyin hammasi boshlanib ketgandi. Shoira Malika Salimova, Malika Maya, Abdumalik ukamiz, Sundar Qoraboyev, Abduvohid Suvonov, yaypanlik ukamiz Subhoniddin, Sobirjon, bankda ishlaydigan ukamiz Otabek va yana ko‘plab insonlarga minnatdorchilik bildiraman. Balki, kimlarningdir ismlari esimdan chiqib qolgan bo‘lsa, uzr so‘rayman. Ularning barchasiga rahmat aytmoqchiman.
Buni aytib o‘taman deya ko‘nglimga tugib qo‘yganman. San’atkorlar ichida Xurshidbek Rasulov hamda ukalari Jahongir Rasulov yordam qilishdi. Ukamiz Ulug‘bek Rahmatullayev, Qilichbek Madaliyev, Yahyobek Mo‘minov yordamlarini ayashmadi.
Mirzo Karim, O‘zbekiston Yozuvchilar uyushmasi a’zosi, shoir
Izoh (0)