Тошкент вилояти Бекобод шаҳридаги марказий буюм бозорида маст эркак ўз танишига пичоқ урди. Бу ҳақда ИИВ Тергов департаменти хабар берди.

Маълум қилинишича, спиртли ичимлик таъсирида бўлган О.П. Тошкент вилояти Бекобод шаҳридаги марказий буюм бозорида ўзи билан мардикорлик қиладиган танишларининг олдига бориб, саломлашмоқчи бўлган. Лекин танишларидан бири А.С. О.П.нинг маст эканини айтиб, у ердан кетиб қолган.

Шундан сўнг О.П.нинг жаҳли чиқиб, мазкур бозор ҳудудида жойлашган ошхонадан пичоқ олиб, А.С.нинг орқасидан бориб, унга беписанд муносабатда бўлдинг, дея қорин бўшлиғига бир маротаба уриб, қасддан тан жароҳати етказган. Оқибатда А.С. Бекобод шаҳар марказий шифохонасига ётқизилган.

Қайд этилишича, ҳозирда жиноят иши юзасидан дастлабки тергов давом этмоқда. Ҳодиса жойини кўздан кечириш вақтида қон доғлари мавжуд бўлган ошхона пичоғи ашёвий далил тариқасида расмийлаштирилган. Жиноят иши юзасидан гумон қилинувчи О.П. Бекобод шаҳар ИИБнинг вақтинча ушлаб туриш ҳибсхонасида сақланмоқда.

Гумонланувчи О.П.га нисбатан Жиноят кодексининг 104-моддаси 2-қисми «э» ва «л» бандлари (безорилик оқибатида қуролни ёки совуқ қурол сифатида фойдаланилиши мумкин бўлган ашёларни ишлатиб, қасддан баданга оғир шикаст етказиш) билан жиноят иши қўзғатилган.