Таниқли инсонлар ҳаётига ҳавас қиладиганлар кўп бўлишига қарамай, уларни таъқиб қилиб, очиқчасига хатарга қўйишни истайдиганлар ҳам топилади. Шунингдек, улар қўрқитишни мактуб ёки турли хил билдиришномалар орқали намоён қилиши вазиятга янада ваҳимали тус беради. Афсуски, буларнинг айримлари ўлим билан ҳам якун топган.
Марк Чепмен − Жон Ленноннинг қотили
The Beatles гуруҳи асосчиси Жон Леннон вафот этган кун дунё мотам тутган. Қотил Марк Чепмен мусиқачини ўлдиришда ҳеч қандай ишора бермаган, аммо ойлар давомида режа тузган.
1980 йил октябрь ойида Леннон Манхэттендаги уйидан овоз ёзиш студиясига бораётганида Чепмен ундан дастхат сўраган. Кечаси Леннон ва рафиқаси Ёко Оно уйга қайтган. Чепмен эса ҳали ҳам уларни кутиб турган эди. У Ленноннинг ортидан 5 та ўқ узган, уларда 4 таси мусиқачининг ўпкасини тешиб ўтган.
Қотил ҳар йили муддатидан илгари озод қилинишини сўраб, ариза ёзади. Аммо Ёко Оно 2000 йилда Нью-Йорк штати афв этиш комиссиясига агар эрининг қотили озод этилса, ўзини хавфсиз ҳис қилмаслигини маълум қилган.
Донетт Найт − Кетрин Зета-Жонс таъқибчиси
Донетт «Кетринни майда бўлакларга бўлиб, танасини итларга ем қилиш»ни хоҳлар эди. Шу билан бирга, Донетт актриса ва унинг турмуш ўртоғи Майкл Дуглас яшайдиган уй манзилини ҳам жуда яхши билган.
Ишсиз Донетт Майкл Дугласни фильмлари орқали севиб қолган. Омма орасида Кетрин турмуш ўртоғини гўёки «алдаган»и ҳақида миш-мишлар тарқалганида, аёл севгилиси учун ҳам қасос олишга қарор қилган.
2003—2004 йиллар давомида Донетт актрисага таҳдидли мактублар ёзган. Шундан сўнг Донетт уч йилга озодликдан маҳрум этилган. У қамоқдан чиққач, юлдузли жуфтликдан узр сўраган: «Агар мени кечирсангиз, коллеждаги ўқишимни давом эттираман». Шундан сўнг Боланинг руҳий саломатлиги мутахассислиги бўйича таълим олди.
Томас Бродники − Селена Гомес таъқибчиси
Бродники хонанда ва актриса Селена Гомеснинг ўлдирилиши ҳақида башорат қилган. Лекин Томасга қўйилган айблов асоссиз экани сабабли унга фақат актрисага яқинлашиш тақиқланган холос. Томас Twitter’да Селенанинг қонга беланган сурати билан саҳифа очиб, у ерда ўзини қасоскор деб эълон қилган. Шунингдек, ҳар бир жойлаштирган твитлари актрисани ўлдиришга қаратилган эди.
Шон Боумен − Ким Кардашьяннинг таъқибчиси
2009 йилда 27 ёшли Шон реалити-шоу юлдузи Ким Кардашьян билан жуда яқиндан танишиш учун Калифорнияга йўл олган. Боумен Twitter орқали юлдуз билан боғланишга ҳаракат қилди. Бироздан сўнг юлдузнинг америкалик севгилиси футболчи Режи Бушга таҳдид мазмунидаги мактублар ёза бошлаган. Унинг барча уринишлари муваффақиятсиз кечгач, ниқоб остида тадбирларга иштирок эта бошлаган. Аммо Кардашьян тақиқ қўйдиришга эришди. Шон юлдуздан 500 метр узоқда бўлиши ҳамда ижтимоий тармоқлардан ҳам ёзмаслиги керак.
Афина Роландо − Бред Питт таъқибчиси
Бир куни Афина актёрнинг уйига кириб, унинг шляпа, футболка, шим ва пойабзалини кийиб олган. Полиция уни ҳибсга олганида, у шунчаки ҳавонинг совуқлигини айтган. Шу билан бирга, Афина ўзи билан жодугарлик ҳақида китоб, Бредга бўлган муҳаббат битиги ва тасма билан безатилган антеннасимон узун темир олиб юради.
Метю Хукер − Никол Кидманнинг таъқибчиси
Метюнинг иккита мақсади бўлган: АҚШ президенти бўлиш ва Никол Кидман билан ишиқий муносабат ўрнатиш. Бир неча ой давомида Хукер актрисага муҳаббат номаларини юборган, уни учрашувга таклиф қилган. Ҳаттоки Николнинг уйига болалар ўқитувчиси сифатида ишга киришга ҳаракат қилган. У яна катта гулдаста билан Николга яқинлашиб, у билан учрашишини сўраганида актрисанинг сабр-тоқати тугаган эди. Уни оиласига яқинлашишдан тақиқлаган.
Бироз ватқ ўтгач, Метю Хукер ўзини президентликка номзод сифатида обрўсини тўккани учун Николни судга берган ва 200 миллион доллар товон пули талаб қилган. У буни ўзининг ишқий муносабатларини яшириш учун қилган эди.
Тимоти Свит − Тэйлор Свифт таъқибчиси
Тимоти Twitter’да 4 та саҳифа яратиб, 6 ой давомида 700 дан ортиқ таҳдидли хабарларни Тэйлорга юборган. 2014 йилда Тэйлор таъқибчига нисбатан тақиқ қўйишга эришди. Шунга қарамай, Тимоти Свифтнинг турмуш ўртоғи эканини, улар биргаликда Беверли-Хиллзда бирга яшашларини ва уларнинг муносабатларига халақит берганларни отиб ташлашни талаб қилмоқда.
Жейсон Пейтон − Женнифер Энистоннинг таъқибчиси
Сансет-Булварда Жейсонга тегишли совуқ қурол, ёпишқоқ тасма ва Женниферга аталган муҳаббат мактублари топилгач, у Лос-Анжелесда ҳибсга олинган. Шунингдек, у «Мен Женнифер Энистонни севаман» деб ёзилган машинада мамлакат бўйлаб саёҳат қилган.
Суд қарорига кўра, йигит актрисанинг уйидан, ўзида ва унинг барча яқинларидан 100 метр узоқликда бўлиши керак. Жейсон онасини калтаклагани учун аввал ҳам судланган эди. Уни даволашга қанча уринишмасин, у дори воситаларини қабул қилмайди. Ҳозирда Жейсон ҳибсда руҳшунос назорати остида.
Изоҳ (0)