Ўзбекистон дунёнинг энг кучли паспортлари рейтингида 86-ўринни эгаллади

Швейцариянинг Henley&Partners компанияси паспортлар рейтингини эълон қилди.

Компания қайд этилишича, Ўзбекистон рўйхатда 86-ўринни эгаллаган. Мамлакат фуқаролари виза расмийлаштирмасдан 57 та мамлакатга чиқиши мумкин. Ўзбекистон 2020 йилнинг июль ойида эълон қилинган рейтингда 86-ўринни, январь ойидаги рейтингда эса 85-ўринни эгаллаганди.

Биринчи ўринни Япония эгаллади. Японияликлар 191 та мамлакатга визасиз ташриф буюриши мумкин. Иккинчи поғонадан Сингапур (190 давлат), ундан кейин Германия ва Жанубий Корея (ҳар бири 189 давлатдан) жой олди.

КХДР (39 та давлат очиқ), Ливия, Непал (38), Фаластин (37), Сомали, Яман (33), Покистон (32), Сурия (29), Ироқ (28) ва Афғонистон (26) фуқароларининг паспортлари рейтингнинг энг қуйи қаторларидан жой олган.

Маълумот учун, Henley рейтинги ҳаракат эркинлиги индекслари асосида тузилади. Бу кўрсаткич ҳар бир давлат фуқароларининг қанча давлатга визасиз ёки виза олиш соддалаштирилган тартибда бориши мумкинлигини ифодалайди.