Тошкент вилояти Янгийўл туманида қўлбола пиротехника воситаларини ясаётган фуқаро қўлга олинди, дея хабар қилмоқда вилоят ИИББ.
Маълум қилинишича, шу кеча-кундузда ИИББ ходимлари Тошкент вилояти ҳудудида пиротехника воситаларининг ноқонуний айланмасига қарши шаҳар-туманлар кесимида назорат-рейд тадбирлари ўтказмоқда.
Вилоят ИИББ жиноят қидирув бўлими тезкор ходимлари томонидан Янгийўл туманида ўтказилган тадбир давомида «Маданият» маҳалласида яшовчи 25 ёшли М.Б. ўзининг уйида кучли портловчи пиротехника воситаларини қўлбола усулда тайёрлаётгани аниқланган.
Ҳолат юзасидан ўтказилган тезкор тадбирда унинг хонадонидан 100 дан ортиқ елим (сантехника) қувур бўлаклари ва бир нечта идишда ушбу воситани ясаш учун ишлатиладиган кимёвий моддалар, дазмол ва бошқа буюмлар далилий ашё сифатида олинган.
Суриштирув давомида фуқаро М.Б. ушбу пиротехника воситаларини тайёрлашда фойдаланган моддасини Бектемир тумани Янгиобод бозоридан ўзига нотаниш бўлган шахсдан 130 минг сўм эвазига сотиб олганлиги, сўнг унга ўзининг томорқасида фойдаланиш учун сақлаётган аммиак селитраси ва бир неча бошқа моддаларни қўшиб тайёрлаганлиги аниқланган.
Ҳозирда мазкур ҳолат юзасидан қўшимча суриштирув ишлари олиб борилмоқда.
Аввалроқ Андижон вилоятида 738 миллион сўмлик пиротехника ва «Тропикамид» препарати мусодара қилингани, Тошкентда машинасидан 11 қути пиротехника буюми топилган 29 ёшли йигитга жиноят иши қўзғатилиб, қамоққа олингани ҳамда Оҳангаронда ноқонуний тарзда 6800 қутига яқин пиротехника воситалари олиб кетаётган юк машинаси аниқлангани ҳақида хабар берилганди.
Изоҳ (0)