Президент Шавкат Мирзиёев 30 декабрь куни 2021 йилги Ўзбекистон давлат бюджетининг ижросини таъминлаш бўйича қарорни имзолади, деб хабар беради ЎзА.
Қарорга кўра, 2021 йил 1 февралдан бошлаб бюджет муассасалари ва ташкилотлари ходимларининг иш ҳақи ҳамда стипендиялар миқдори 10 фоизга оширилади. Ушбу санадан бошлаб Ўзбекистон ҳудудида меҳнатга ҳақ тўлашнинг энг кам миқдори ойига 747,3 минг сўм (679,3 минг сўм) этиб белгиланади.
Базавий ҳисоблаш миқдори эса 223 минг сўмдан 245 минг сўмга кўтарилади. Қарорда 14 ёшгача болалари бўлган оилаларга тўланадиган нафақа миқдори 10 фоизга оширилади. Бола икки ёшга тўлгунга қадар бола парвариши бўйича нафақа 434 минг сўм этиб белгиланади.
Кам таъминланган оилаларга бериладиган моддий ёрдам 326−653 минг сўм этиб белгиланади. Қарорда Қорақалпоғистон Республикаси ва Хоразм вилоятидаги муҳтож оилаларга бир марталик моддий ёрдам миқдорлари белгиланиши кўрсатиб ўтилган.
Эслатиб ўтамиз, 2020 йил 1 февралдан меҳнатга ҳақ тўлашнинг энг кам миқдори, ҳамда пенсия, стипендия ва нафақалар ўртача 7 фоизга оширилган эди. 1 сентябрдан бошлаб пенсия ва нафақалар 10 фоизга оширилган эди. Фармон билан 14 ёшгача болалари бўлган оилалар учун нафақа олувчилар сонини 2 баравар ва 2 ёшгача бўлган болага қараш учун нафақа олувчилар сонини 20 фоизга оширилган эди.
Изоҳ (0)