Марказий банк раиси Мамаризо Нурмуродов «Ўзбекистон 24» телеканалига берган интервьюсида Президентнинг парламентга мурожаати орқали тизимга юкланган вазифалар ҳақида гапирди. «Kun.uz» Марказий банк раиси билдирган фикрларидан асосий тезисларни келтирди.
Инфляция даражаси белгиланган меъёрлар доирасида бўлиши керак.
Марказий банк олдида турган вазифалардан бири, бу инфляция даражасининг белгиланган меъёрлар доирасида бўлишини таъминлашдан иборат.
Инфляцион таргетлаш режимига ўтиш орқали макроиқтисодий барқарорликнинг асосий негизларидан бўлган инфляцияни пасайтириш Марказий банкка вазифа қилиб қўйилган. 2020 йилда макроиқтисодий ҳолат қийинчилигига қарамасдан, Марказий банк 11 ярим фоизга инфляцияни пасайтириш даражасига эришгани таъкидланган.
Президент мурожаатномасида 2021 йилда бу кўрсаткични 10 фоиз даражасига тушириш вазифаси белгиланди.
Бунга эришишнинг асосий йўллари энг аввало, пул-кредит сиёсатида қўлланиладиган пул-кредит инструментларидан фаол фойдаланган ҳолда барча монитар омилларнинг инфляцияга таъсирини камайтириш чораларини кўришдан иборат. Пандемия шароитида озиқ-овқат хавфсизлигини таъминлашга жиддий эътибор қаратиш зарурлиги, асосий озиқ-овқат маҳсулотлари нархининг кескин ошиб кетишига йўл қўймаслик мақсадида импорт соҳасидаги бож тўловлари бўйича берилган имтиёзлар яна бир йилга узайтирилиши белгилаб берилди.
Аҳолининг тадбиркорликка интилиши давлат томонидан молиявий қўллаб-қувватланади.
Регулятор олдига янги масала қўйилган. Тадбиркорликни молиявий қўллаб-қувватлаш борасидаги ишларни давом эттириш мақсадида оилавий тадбиркорлик дастурлари доирасида келгуси йилда 6 триллион сўм имтиёзли кредитлар ажратилади.
Ҳукумат томонидан Жаҳон банки билан биргаликда бошланган қишлоқларда тадбиркорликни ривожлантириш дастурини кенгайтириш учун қўшимча 100 миллион доллар йўналтирилади.
Ёшлар тадбиркорлиги ва бандлигини таъминлаш учун 100 миллион доллар, шунингдек, ёшларнинг бизнес лойиҳаларини кредитлаш ҳамда уларни касб-ҳунарга ўқитиш учун 1 триллион сўм ва 50 миллион доллар ажратилади.
Аёлларнинг бизнес-лойиҳаларини қўллаб-қувватлаш ҳамда жойларда аниқланган хотин-қизлар муаммоларини ҳал этиш учун бюджетдан қўшимча равишда 1 триллион сўмдан зиёд (100 миллион доллар) маблағ йўналтирилади. Бунинг учун «Халқ банки» томонидан жойларда хотин-қизларни тадбиркорликка ўқитиш, намунавий бизнес-режаларини ишлаб чиқиш ва кредит олишда уларга амалий ёрдам кўрсатишнинг янги тизими жорий этилади.
Келгуси йилда аҳолининг ижтимоий ҳимояси янада кучайтирилади. Эҳтиёжманд оилаларни уй-жой билан таъминлаш бўйича олиб бораётган ишлар кўлами янада кенгайтирилади. Бунда 27 мингта ёки бу йилгига нисбатан 2,5 баробар кўп оиланинг ипотека кредити бўйича дастлабки бадалларини тўлаш ва кредит фоизларини субсидиялаш учун 2,4 триллион сўм йўналтирилади.
Валюта сиёсатида амалга оширилаётган эркинлаштириш жараёнлари 2021 йилда ҳам давом этади.
Учинчи муҳим макроиқтисодий йўналишлардан мурожаатномада белгилангани, бу 2021 йилда ҳам валюта сиёсатини эркинлаштириш жараёни давом эттириш ҳисобланади.
Шу ўринда қайд этишим керакки, Марказий банк валюта бозорини эркинлаштириш борасида 2017 йилда дастлабки қадамларни қўйган эдик. Президентнинг мурожаатномасида уни янги босқичга кўтариш олдимизга вазифа қилиб қўйилди. Яъни тадбиркорлар учун валюта хариди янада осонлашиши кутилмоқда.
Бундан ташқари, келгуси йилда валюта кредитлари улушини ҳозирги 50 фоиздан 45 фоизга, яъни камида 2 миллиард долларга пасайтириш лозимлиги таъкидланди. Келгуси йилда миллий валютада чиқариладиган халқаро облигациялар улушини ҳозирги 25 фоиздан камида 40 фоизга ошириш зарурлигига эътибор қаратилди.
Изоҳ (0)