Сурхондарё вилояти Музработ тумани «Оби ҳаёт» маҳалласида яшовчи фуқаролар 27 декабрь куни электр энергия таъминотидаги узилишдан норози бўлиб, кўчада балон ёқди. Ушбу ҳолат юзасидан туман ҳокимлиги муносабат билдирди.

Унга кўра, 25 декабрь куни маҳалладаги қуввати 630 кВА трансформаторнинг ишдан чиқиши оқибатида 26 декабрь куни қуввати 400 кВА бошқа трансформатор ўрнатилган. Аммо электр энергиясига бўлган эҳтиёжнинг ортиши натижасида у ҳам ишдан чиққан.

Хокимлик ахборотига кўра, «Оби ҳаёт» маҳалласида 545 та хонадон бўлиб, ушбу ҳодиса оқибатида 165 та хонадоннинг электр таъминотида узилиш юзага келган.

«Муаммони бартараф этиш мақсадида 27 декабрь куни 630 кВА кучланишга эга янги трансформатор ўрнатилиб, аҳоли электр энергия билан таъминланган», — дейилади хабарда.

Аввалроқ Бухоро вилоятининг Қоракўл ва Бухоро туманлари аҳолиси газ йўқлиги сабаб йўлни тўсиб қўйган эди. Аҳолининг сўзларига кўра, туманда олти кун умуман газ бўлмаган.

Эслатиб ўтамиз, ўтган йили Андижон, ФарғонаСирдарё вилоятлари ҳамда Қорақалпоғистонда газ ва электр энергияси йўқлиги сабаб аҳоли йўлларни ёпиб қўйишганди ва шу орқали ўз муаммоларига ҳокимият вакилларини эътиборини тортишга уринишган эди.