Самарқанд вилоятининг Оқдарё туманида Isuzu юк машинаси ва йўловчи ташувчи автобус иштирокида ЙТҲ содир бўлди. Бу ҳақда Ички ишлар вазирлигининг Йўл ҳаракати хавфсизлиги бош бошқармаси хабар берди.
Дастлабки маълумотларга кўра, 27 декабрь куни соат 17:00 ларда Оқдарё тумани ҳудудидан ўтган М 37 автомобиль йўлининг 14-километрида 1984 йилда туғилган ҳайдовчи С.А. Isuzu русумли юк автомобилини Самарқанд—Каттақўрғон йўналишида бошқараётиб эҳтиётсизлиги оқибатида ўзидан олдинда бўлган ҳайдовчи, 1974 йилда туғилган Б.А. бошқарувидаги йўловчи ташувчи автобуснинг орқа томонига урилган. Зарб оқибатида автобус ўнг томон пастликка ағдарилган.
Автобусда бўлган йўловчилардан бир нафари биринчи тез тиббий ёрдам кўрсатиш мақсадида шифохонага олиб кетилган.
Мазкур ЙТҲ юзасидан Оқдарё тумани ИИБ ЙҲХБ томонидан суриштирув ишлари олиб борилиб, ҳодиса сабабларига аниқлик киритилмоқда.
Аввалроқ Самарқандда автобус «Нива» билан тўқнашиб, йўлга ағдарилгани, Тошкентда 47-сонли йўналишда ҳаракатланувчи автобус ёниб кетгани, Жиззахда Nexia билан тўқнашган автобус йўлга ағдарилгани, шунингдек, Тошкентда йўл талашган Mercedes ва Isuzu автобуслари бир-бирига урилиб кетгани тўғрисида хабар берилганди.
Изоҳ (0)