Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов ва унинг ўринбосари Саида Мирзиёева 8 йилдан буён Республика уруш ва меҳнат фахрийлари пансионатида истиқомат қилаётган Ўзбекистоннинг фахрий журналисти Рустам Обидов ҳолидан хабар олди. Бу ҳақда Комил Алламжонов ўзининг Telegram’даги канали орқали маълум қилди.
«Рустам Обидов аллақачон пенсияга чиққанига қарамай, таржималар қилиб, астойдил ишлашда давом этмоқда.
Афсуски, бу йил пандемия туфайли бу ҳалол, меҳнатсевар ва жуда камтар инсон қийин молиявий вазиятга тушиб қолди. Шу сабабли, ҳам пансионатда яшаш харажатларининг барчасини тўлай олмаган.
Масс-медиа фонди ва шахсан мен Рустам Обидовга унинг муаммоларини ҳал қилишда ёрдам беришни ўз бурчимиз деб ҳисоблаймиз. Фахрий журналистлар Ўзбекистон тарихидир. Уларнинг меҳнати ва фидокорона фаолияти туфайли биз мамлакатимиз босиб ўтган йўл ҳақида биламиз. Ва бизнинг бу кўмагимиз уларга ва уларнинг меҳнатларига билдирилган миннатдорчилигимизнинг кичик бир қисмидир», — деб ёзади Комил Алламжонов.
Sputnik’нинг ёзишича, журналист Рустам Обидов пансионатидан 18 миллион сўм миқдорида қарзи бор. Масс-медиани ривожлантириш фонди ушбу тўловни ўз зиммасига олган.
Мавзуга доир: «Замин» фонди кўмагида 2020 йилда эшитиш қобилиятини йўқотганларга имплантларни ўрнатиш бўйича 36 та операция амалга оширилди
Изоҳ (0)