«Avto.ru» сайтида 1983 йилда ишлаб чиқарилган ва тўлиқ реставрация қилинган «ЛуАЗ-967» йўлтанламаси сотувга қўйилди. Москвалик сотувчи эшиклари йўқ армия транспортёри учун 400 минг рубль (5,4 минг доллар) сўрамоқда, деб хабар беради Motor.
«ЛуАЗ-967» 1965 йилдан 1989 йилга қадар Луцк автомобиль заводида ишлаб чиқарилган бўлиб, «Олд соҳали транспортёр» тоифасига киради. Енгил сузувчи йўлтанламасга бўлган зарурат 1953 йилда якунланган Шимолий ва Жанубий Корея ўртасидаги уруш вақтида юзага келган.
Амфибия-автомобиль кичик миқдордаги юкларни, шунингдек, ўқ-дори ва қуролларни ташишга мўлжалланган. «ЛуАЗ»нинг қуруқликдаги тезлиги соатига 75 километрга етади, сувда эса соатига 3 километрдан ошмайди. Машина паррак билан жиҳозланмаган ва сувда ғилдираклар томонидан ҳосил қилинадиган эшиш эффекти орқали ҳаракатланади.
Сотувчининг сўзларига кўра, ушбу нусха 37 йил давомида икки километргина йўл босган. У тўлиқ реставрация қилинган ва ҳатто ҳисобга ҳам олинган. Йўлтанламас кузовига рух билан ишлов берилган, редукторлари алмаштирилган, салонида эса «УАЗ»нинг янги ўриндиғи пайдо бўлган.
Автомобиль 37 от кучига эга 1,2 литрли бензин двигатель ёрдамида ҳаракатга келиб, у механик узатмалар қутиси ёрдамида бошқарилади.
Аввалроқ россиялик муҳандислар «Қораялоқ» номли ҳарбий амфибияни яратгани, шунингдек, блогерлар Lada XRay автомобилини сувда сузишга мослаштиргани тўғрисида хабар берилганди.
Изоҳ (0)