Ижтимоий тармоқларда бир гуруҳ йигитлар иштирокидаги гўёки пичоқбозлик акс этган видео тарқалди. Тошкент шаҳар ИИББ мазкур видеони ўрганди ва унинг иштирокчилари шахсини аниқлади. Бу ҳақда «Севимли» телеканалининг «Замон» ахборот дастури хабар берди.
Воқеа иштирокчиларидан бирининг сўзларига кўра, пичоқбозлик пиар қилиш мақсадида саҳналаштирилган, видеода акс этган воқеада йигитлар бир-бирига пичоқ эмас, балки тароқ билан «ҳужум қилган».
Бошқа бир иштирокчининг айтишича, улар мазкур видеони тўлиқ вариантини ижтимоий тармоқлардаги профилларига жойлаган ва унда воқеа пиар эканлиги билинган, бироқ баъзи блогерлар видеонинг тўлиқ бўлмаган вариантини тарқатгани сабабли унинг пиар эканлиги билинмаган.
Чилонзор туман маъмурий ишлар суди қарорига кўра, мазкур йигитлар Маъмурий жавобгарлик тўғрисидаги кодекснинг 183-моддаси (майда безорилик) ва 194-моддаси 1-қисмида (ички ишлар органлари ходимининг қонуний талабларини бажармаслик) назарда тутилган ҳуқуқбузарликларни содир этган деб топилди. Уларга нисбатан узил-кесил беш сутка маъмурий қамоқ жазоси тайинланди.
Изоҳ (0)