Бектемир Мелиқўзиевнинг бўлажак рақиби жиддий жазоланиши мумкин. У Канело иштирокидаги жангни ноқонуний трансляция қилган

DAZN стриминг компанияси бокс бўйича ярим оғир вазн тоифаси собиқ чемпиони Сергей Ковалёвни (34-1-4, 29 КО) жазога тортиши мумкин.

Россиялик боксчи Сауль Альварес (54-1-2, 36 КО) ва Каллум Смит (27-1, 19 КО) ўртасида кечган жангни Instagram тармоғида ноқонуний йўл билан трансляция қилган. Бу ҳақда The Athletic журналисти Майк Коппинжер хабар қилди.

Стриминг раҳбарияти Ковалёвнинг бу ҳаракатидан ғазабда экани айтилмоқда. У Бектемир Мелиқўзиевга (6-0, 5 КО) қарши кечадиган кейинги жангини айнан DAZN платформасида ўтказади.

Ковалёвнинг трансляцияси 2,5 мингдан ортиқ томошабин йиғган. Бу DAZN учун 50 минг доллардан (ойлик обунани ҳисоблаганда) 250 минг долларгача (йиллик обунада) йўқотиш дегани.

Манбада келтирилишича, DAZN бу ҳолат юзасидан чора кўриши мумкин. Журналист бу масалада ҳар икки томоннинг муносабатини билишга уринган, бироқ уларнинг ҳеч бири сўровга жавоб бермаган.

Эслатиб ўтамиз, Ковалёв кейинги жангини 30 январь куни ўзбекистонлик боксчи Бектемир Мелиқўзиевга қарши ўтказади.