Donald Tramp Rossiyaning Amerikadagi saylovlarga aralashuvi ishi bo‘yicha ayblangan ikki kishini afv etdi

AQShning amaldagi prezidenti Donald Tramp 15 kishini afv etish va yana besh kishiga nisbatan hukmlarni qisman yoki butunlay yumshatish to‘g‘risidagi farmonni imzoladi, deb yozadi Meduza.

Afv etilganlar ro‘yxatiga Rossiyaning AQSh prezidenti saylovlariga aralashuvi haqidagi ishning ikki figuranti kirdi. Bular — Tramp saylovoldi shtabining sobiq maslahatchisi Jorj Papadopulos va Niderlandiya fuqarosi, rossiyalik biznesmen German Xanning kuyovi Aleks van der Svaan. Ularning ikkalasi ham maxsus prokuror Robert Myullerning tekshiruvi doirasida yolg‘on ko‘rsatmalar berganlikda ayblangan edi.

2018-yil sentabrda Papadopulos Federal qidiruv byurosiga (FQB) rossiyalik yuqori mansabli amaldorlar bilan bog‘liqligini da’vo qilgan odamlar bilan aloqalari haqida yolg‘on ko‘rsatmalar berganlik ayblovi bilan jazoga hukm qilingan edi. Maxsus prokuror Robert Myullerning “Rossiya ishi” haqidagi ma’ruzasida aytilishicha, Papadopulos, go‘yoki, Rossiya hukumatida homiylari bo‘lgan britaniyalik professor Jozef Mifsud bilan muzokaralar olib borgan.

FQB sobiq rahbari Jeyms Komi “Rossiya ishi” bo‘yicha tekshiruv boshlanishi uchun Jorj Papadopulosning Londondagi odam bilan “ruslarning qo‘lida bo‘lgan va Xillari Klintonga zarar yetkazishi mumkin bo‘lgan o‘g‘irlangan yozishmalar” haqida suhbatlashgani bo‘yicha paydo bo‘lgan ma’lumot asos bo‘lgan.

Noyabrda Donald Tramp xavfsizlik bo‘yicha sobiq maslahatchisi, Rossiya bilan aloqalar bo‘yicha FQBga yolg‘on axborot berganlikda ayblangan Maykl Flinni afv etgan edi. Iyulda esa “Rossiya ishi” doirasida yolg‘on ko‘rsatma berishda ayblangan qadrdon do‘sti va maslahatchisi Rojer Stounga belgilangan jazoni yengillashtiruvchi qarorni imzoladi.