Ла Лиганинг 2019/20 йилги мавсумдаги энг яхши ўйинчиси аниқланди. Соврин 11 йил деганда Месси ёки Роналдудан бошқа ўйинчига топширилди

«Реал» ҳужумчиси Карим Бензема Marca талқинига кўра Испания чемпионати 2019/20 йилги мавсумнинг энг яхши ўйинчиси деб топилди.

Карим Бензема ушбу совринни қабул қилиб олди. Шунингдек, «Реал» вакиллари Тибо Куртуа ва Зинедин Зиданга мавсумнинг энг яхши дарвозабони ҳамда мураббийи учун аталган соврин тақдим этилди.

2019/20 йилги мавсумда «Реал» 87 очко тўплаган ҳолда Ла Лига ғолиблигини қўлга киритди. Мадридликлар энг яқин таъқибчи «Барселона»ни 5 очкога ортда қолдирди.

Франциялик футболчи ўтган мавсумда Примeранинг 37 ўйинда қатнашиб, 21 гол ва 8 та голли узатма муаллифига айланди.

Маълумот учун, ушбу соврин 2009 йилдан буён Лионель Месси ёки Криштиану Роналдуга насиб этаётганди.

Бензема 2009 йилдан буён «Реал»да тўп суриб келади. Унинг клуб билан амалдаги шартномаси 2022 йилнинг ёзига қадар мўлжалланган. Жорий мавсум франциялик футболчи Ла Лигада 7 та гол урди ва 5 та голли узатма муаллифига айланди.