«АЭС бўйича шартнома тайёр, техник жиҳатлар қолди» — Россиянинг Ўзбекистондаги элчиси

Ўзбекистоннинг мамлакатда атом электростанцияси қуриш бўйича Россия билан шартномаси «деярли тайёр», техник жиҳатлар қолган. Бу ҳақда Россиянинг Тошкентдаги элчиси Владимир Тюрденев 21 декабрь куни маълум қилди, деб ёзмоқда «Gazeta.uz».

Атом электр станциясини қуриш бўйича шартномани 2019 йилнинг охиригача имзолаш, ишларни эса танланган майдон — Жиззах вилоятидаги Тузкон кўли қирғоғида бошлаш 2020 йилнинг бошига режалаштирилганди.

Элчининг аниқлик киритишича, айни пайтда томонлар қўшимча масалалар устида иш олиб бормоқда. Хусусан, гап бўлажак станция учун сув истеъмолини камайтириш ҳақида кетмоқда. «Бироқ сизни ишонтириб айтишим мумкинки, иккала томон ҳам лойиҳа амалга оширилиши кераклигидан келиб чиқмоқда. Бу барча даражаларда тасдиқланмоқда. Масала лойиҳани амалга оширишнинг техник жиҳатлари бўйича қолмоқда», — дея қўшимча қилган элчи.

2019 йилда «Ўзатом» директори Жўрабек Мирзамаҳмудов Тузкон кўлининг хавфсизлиги бўйича саволга жавоб берган.

«Биз қанча сув ишлатилиши, унинг қандай ишлатилиши ҳақида кўп гапирдик. Буғ ишлаб чиқариш, электр энергиясини генерация қилиш, совитиш учун АЭСда фойдаланиладиган сув истеъмоли бизнинг ҳозирги иссиқлик электр станцияларимизда ишлатиладигандан ортиқ эмас», — дея маълум қилган Жўрабек Мирзамаҳмудов.

Шунингдек, «Ўзатом» раҳбари Тузкон кўлининг суви реакторларни совитиш учун етарли эканлигини қайд этган. «Бу ҳисоб-китоблар давом этмоқда, биз эса совитишнинг турли вариантларини кўриб чиқяпмиз», — дея аниқлик киритган Мирзамаҳмудов.

«2019—2029 йилларда Ўзбекистон Республикада атом энергетикасини ривожлантириш концепциясини тасдиқлаш тўғрисида»ги Президент қарорига кўра, Ўзбекистон атом электр станцияси қурилишини 2022 йилдан эрта бошламайди.

Ҳужжатга кўра, мамлакатдаги илк атом электр станциясини барпо этиш уч босқичда амалга оширилади. Биринчи босқич — 2019—2020 йилларда АЭС қуриладиган жой аниқланади, 2020—2021 йилларда лойиҳанинг техник-иқтисодий асосини ишлаб чиқиш режалаштирилмоқда. 2022 йилдан эса объект қурилишига киришилади.

Россия дизайни асосида қуриладиган ушбу АЭС қиймати тахминан 11 миллиард долларга баҳоланган.

Аввалроқ МАГАТЕнинг Ўзбекистондаги ядровий инфратузилмани комплекс кўриб чиқиш миссияси 2021 йилга кўчирилгани хабар берилган эди.