Миржалол Қосимов: «Пахтакор» кучли жамоа, бироқ финал битта ўйиндан иборат

ОКМК клуби бош мураббийи Миржалол Қосимов Coca-Cola Ўзбекистон Кубоги финали доирасида «Пахтакор»га қарши кечадиган учрашув олдидан ўз фикрлари билан ўртоқлашди.

Суперлига доирасида «Навбаҳор»га қарши ўйинда Наманганга кубок финали учун қайтиб, мезбонларга қарши ўйнашни ният қилгандик. Аммо бу футбол, ўз меҳнатимиз билан финалга чиқдик. Бу ерга яхши ниятлар билан келдик. Намангандаги бу стадионда муҳит доим яхши бўлган. Мухлислар доим «Навбаҳор»нинг 12-ўйинчиси бўлиб келади. ОКМК жамоаси финалга муносиб тайёрланди. «Пахтакор»ни таърифлаш шарт эмас, рақиб қандай кучга эга эканлигини барча билади. Бекорга улар чемпион бўлмади. Аммо кубок финали битта ўйиндан иборат, ғалаба қозониш учун ҳаракат қиламиз. Стадионга келган мухлислар курашларга бой ўйинни томоша қилади ва хурсанд бўлиб уйга қайтишади.

Финалга осонгина чиқиб қолмадик. Дастлаб сафарда «Локомотив»ни мағлуб этдик, кейин «Металлург»га қарши баҳс бўлди, ярим финалда «Насаф»ни ютдик. Бу жамоа ҳам жуда кучли. Осон ўйинлар бўлгани йўқ. Ҳақли равишда финалга чиқдик. Битта ўйинда барча нарса бўлиши мумкин, камроқ хато қилишга ва имкониятлардан фойдаланишга интиламиз. Финалда боримизни бериб ўйнашга ҳаракат қиламиз.

Футболда жароҳатлар кўп учрайди, бу одатий ҳолат. Футбол ва жароҳатлар ёнма-ён туради. Пандемия сабаб бутун дунё учун йил жуда оғир ўтди. Мавсум ҳам чўзилиб кетди. Санжар Турсунов майдонга туша олмайди. Бобур Йўлдошев, Миржамол Қосимов ва Муроджон Тошматовда кичик жароҳатлар бор.

Биз футболни мухлислар учун ўйнаймиз. Улар стадионга келиб, ёқтирган жамоаларига мухлислик қилишини, футболдан завқ олишини истаймиз. Наманганда доим ажойиб мухлислик бўлган, ўйлашимча, мухлислар тўла стадионда ўйнаймиз. Бўш трибуналар барибир финалга хос эмас. Муҳит ҳам бошқача бўлади. Ўз вақтида футбол ўйнаганимда ҳам Наманганда мухлислар ажойиб тарзда ўз жамоаларини қўллаб-қувватларди. Наманганда футболга бўлган меҳр ўзгача.

Айни пайтда ОЧЛ ҳақида ўйлаётганим йўқ. Олдимизда финал бор ва шу боис халқаро мусобақа ҳақида ҳозирдан ўйлаш нотўғри бўларди. Мен ўйиндан-ўйинга сакрашни ёқтирмайман. Бизни «Пахтакор» билан муҳим ўйин кутмоқда.

Агар Осиё Чемпионлар Лигасида иштирок этсак, унда шунга яраша таркибни кучайтиришимиз керак бўлади. Чунки ОКМК халқаро майдонда нафақат Олмалиқ шаҳри шаъни, балки бутун Ўзбекистон шарафини ҳимоя қилади ва яхши натижалар қайд этишга интиламиз.

Анча йиллардан буён мураббийлик қиляпман ва ҳакамлар ҳақида деярли гапирмаганман. Ҳакамлар назоратчилари бор, уларга баҳо бериш бизнинг иш эмас. Финалда хорижлик ҳакамлар? Олдинроқ ҳам шундай бўлганини эслайман, лекин айни пайтда ўзбек ҳакамларининг малакаси араб ҳакамларидан баландроқ.

ОКМК жамоаси якунлаётган йилдан кўнгли тўлдими? Жамоада қоровулдан бошлаб раҳбаргача барча битта мақсад йўлида бирлашган. Осон йил бўлгани йўқ, мавсум жуда оғир ўтди. Барча футболчилар чарчаган. ОКМК ўз тарихида илк бор чемпионатда бронза медалларига эга чиқди. Бу осон бўлгани йўқ. Буни тагида катта меҳнат турибди. Жамоада ишлайдиган барча буни яхши билади.

Миржалол Қосимов, ОКМК бош мураббийи

ОКМК ва «Пахтакор» жамоалари ўртасидаги финал учрашуви 20 декабрь, якшанба куни Намангандаги «Марказий» стадионида ўтказилади. Учрашув 15:00 да бошланади.