Шота Арвеладзе: «ОКМК — финалда ўйнашни биладиган жамоа. Ўйинга энг кучли таркибни ташлаймиз»

«Пахтакор» клуби бош мураббийи Шота Арвеладзе Coca-Cola Ўзбекистон Кубоги финали доирасида ОКМКга қарши кечадиган учрашув олдидан ўз фикрлари билан ўртоқлашди.

Қўқондаги ўйиндан кейин энг кучли жамоалар ярим финалга етиб келганини айтгандим. Финалда ҳам шундай. Рақибимиз яхши жамоа. Аввалги икки финалда ҳам шу клуб билан тўқнаш келгандик. Мавсумни барқарор ўтказдик деб ўйлайман. ОЧЛда ҳам яхши ўйнадик, афсуски, финалга чиқа олмадик. Аммо кўрсатган ўйинимиздан қониқдим. Ишонаманки, «Пахтакор»да ҳали ОЧЛ финалига чиқиш учун кўплаб имкониятлар бўлади. Финал қийин ва қизиқарли кечади. Рақиб финалда ўйнашни яхши биладиган жамоа

Албатта, ўйинга энг кучли таркибни майдонга туширамиз. Аммо майдонда барча 11 нафар футболчи ўйнай олмайди. Битта йўқотиш бор: Фарруҳ Сайфиев дисквалификация сабабли ўйнай олмайди

Финалдан кейин уйга учиб кетаман. Узоқ вақтдан буён уйимга борганим йўқ. Ўз яқинларим билан янги йилни кутиб оламан. Таклифлар бўлиши мумкин, аммо байрамни ўтказиб яна «Пахтакор»га қайтаман.

Ўзбекистон терма жамоаси Жаҳон Чемпионатига чиқиши учун нима етишмайди? Футболда имкон борича яхши шароитларни яхши даражага келтириб, барчаси доимий ўсиб боришига уриниш лозим. Айтайлик, майдон, ёритиш тизими ёки бошқа жиҳатлар бўйича муаммолар бўлмаслиги керак.

«Пахтакор» соврин ютишдан зерикмадими? Агар «Бавария» мураббийи олдида ўтирганингизда бундай савол бермаган бўлардингиз, менимча. Совринларга эга чиқиш доимо ёқимли. Биз бунга барқарор эришаётганимиз яна-да хурсандчилик беради. Ҳеч бир жамоа бирор совриндан кейин тўхтаб қолишни хоҳламайди. Биз янги-янги ғалабалар учун интиламиз.

«Пахтакор» сафига келган ҳар бир ўйинчи яхши ўйнаб кета олмаслиги мумкин. Бутун дунёда шундай. Яхши футболчилар кучлироқ клубларга ўтади. Таркибимизда ўзимиздан чиққан тарбияланувчилар кўп. Кримец, Машарипов, Сергеев, Анзур Исмоилов, Алижонов, Козак, Собиржонов, Эркинов, Сидиқов. Қолаверса, легионерларни ортиқча жалб этмай маҳаллий футболчиларни харид қиляпмиз. Бу эса пуллар ўзбек футболида қолади дегани.

Стадионга келган мухлислар қайси клубга кўпроқ мухлислик қилади? Ўзингиз ҳам жавобини биласиз-ку. Наманганлик мухлислар негадир «Пахтакор»га ҳеч қачон ва ҳеч қаерда мухлислик қилмайди. Нега бундайлигини билмайман. Агар нимадир ўзгарган бўлса ва ўйинда бизга мухлислик қилишса хурсанд бўлардим.

Шота Арвеладзе, «Пахтакор» бош мураббийи

«Пахтакор» ва ОКМК жамоалари ўртасидаги финал учрашуви 20 декабрь, якшанба куни Намангандаги «Марказий» стадионида ўтказилади. Учрашув 15:00 да бошланади.