Қиш келиши билан гардеробда ёзги либослар бир четга сурилади. Токи ёз мавсуми келмагунча улардан фойдаланилмайди. Лекин мода олами мутахассислари бу борада бошқа фикрда. Қишки қалин ва иссиқ кийимларни ҳам ёзги нафис либослар билан уйғунлаштириш мумкин.
Плиссировкали юбка ва свитер
Ёзда кийиладиган плиссировкали юбкалар қишда ҳам ўзгача кўриниш касб этади. Тиззадан тушиб турувчи ушбу услубдаги юбкалар қалин свитер ва узун этиклар билан ажойиб комбинацияни ҳосил қилади. Энди гардеробда ёзни кутиши шарт бўлган юбкалардан қиш фаслида ҳам унумли фойдаланиш имконияти мавжуд.
Енгил либос ва қалин кўйлак
Пальто матосидан тикилган қалин кўйлаклар ёзги енгил либос билан мос тушади. Гарчи пальто-кўйлак қалин ва бироз қўпол бўлса-да, унга енгил либос нафислик бағишлаб туради. Ушбу уйғунлашувни пойабзал ёки кроссовкалар билан мослаштириш мумкин. Ажойиб услуб либос эгасига янада қулай бўлиши шубҳасиз.
Оқ кўйлак ва қора пойабзал
Оқ либослар фақатгина ёзда кийилиши керак, деган фикр ўз кучида эмас ҳозирда. Шунингдек, оппоқ либосларга турли хил рангдаги пойабзаллар мос тушади. Уларнинг энг яхшиси қора рангдир. Қора сумкага мос ҳолда қора этик ёки пойабзал кийиш мумкин.
Шойи юбка ва жемпер ёки пиджак
Шойи юбкалар ҳам фақат ёз учун мўлжалланмаган. Уни пиджак, жемпер ёки свитерлар билан биргаликда бир тўпламга айлантириш мумкин. Албатта, бу услуб билан бироз қалин ва ҳарбийларникига ўхшаш этик кийиш тавсия этилади.
Ёзги кўйлак ва шим
Ёзги енгил либослар шим билан бирлаштирилгандан сўнг унга мос оёқ кийим излашга ҳожат қолмайди. Сабаби ҳар қандай пойабзал ва кроссовкалар шим учун тўғри келади. Бу каби кийиниш услубида ранглар унчалик муҳим эмас, дидга кўра бир хил ёки ёзги кўйлакнинг ёрқин рангдагисидан ҳам фойдаланиш мумкин.
Изоҳ (0)