Маникюр салонларига боришни бас қилиш орқали нафақат ойлигингиз тежалиши, балки тирноқларингиз аввалгидек мустаҳкам ва тез синмайдиган бўлишига сабабчи бўласиз.
Тирноқлар мустаҳкам бўлишни бошлайди
Кимёвий аралашмалардан ташкил топганига қарамай, тирноқ бўёғи зарарсиз ҳисобланади, лекин уни ўчириш учун фойдаланиладиган суюқлик нафақат тирноқ, балки тирноқ атрофидаги терига ҳам зарар етказади. Унга «ацетон»и йўқ, деб ёзилган ёрлиқ ёпиштирилганига қарамай, бармоқ учларини ёғсизлантириб, қуритиб ташлайди. Оқибатда эса қуриган тери буришиб, кўчишни бошлайди.
Тирноқлар ранги ёрқинроқ бўлади
Вино, қаҳва ва сигарет тишларни сарғайтиргани сингари лакдан мунтазам фойдаланиш тирноқнинг табиий оч пушти ранги хиралашишига сабаб бўлади. Бўёқсиз юролмаган тақдирингизда ҳам орада бир ёки икки ҳафта танаффус қилинг, тирноқларингизни табиий ва соғлом ранги қайтишига гувоҳ бўласиз.
Силлиқлашади
Тирноқлар микроскопда кўрилганда «черепица»га ўхшайдиган кератин зарраларидан ташкил топади. Ҳар гал лак ўчирилганда эса унинг устидаги бир қават сидирилади. Тирноқларни бироз муддат ўз ҳолига қўйсангиз улар аввалгидек силлиқ бўлади.
Аммо қўшимча намлантириш керак бўлади
Тирноқларга лак сурилмаганда, аввалгидек қатлам бўлмагани сабаб ҳам мўртроқ бўлиб қолиши мумкин. Шу боис уни доимо намлантириб туриш керак. Бунинг учун махсус ёғлардан фойдаланиб, тирноқ четидаги терини кунига 2-3 марта озиқлантириб туринг.
Инфекция юқтириш хавфи камаяди
Аслида маникюр салонларида ишлайдиган ходимлар ҳар бир мижоздан кейин фойдаланадиган ускуналарни дезинфекциялаб туриши керак. Аммо ҳамма ҳам бунга риоя қилавермайди ё бўлмаса таркибида инфекция ва бактерияларни ўлдиришга қодир бўлмаган воситалар билан зарарсизлантиришни ўзи билан чекланади. Керакли вақтда ускуналарни дезинфекция қиладиган аппаратга қўйишни унутиш ҳолатлари ҳам кузатилиши мумкин. Шу сабаб ҳам маникюр қиладиган ходим хизматидан фойдаланганда вирусли ёки бошқа инфекцияларни юқтириб олишингиз хавфи юқори бўлади.
Пулингиз чўнтагингизга қолади
Сиз одатда қанчалик тез маникюр қилдиришингизга қараб, унга бормай қўйиш орқали маълум миқдорда пул тежашингиз мумкин бўлади. Ҳар икки ойда салонга пул сарфлаган тақдирингизда ҳам бир йилда бир ойлик иш ҳаққингизнинг ярмини беҳудага сарфланмаслигига сабаб бўлишингиз мумкин.
Ортиқча бош қотирмайсиз
Маникюр қилдиришни бас қилиш орқали сиз кейинги сафар қандай лак рангини танласам экан, деб бош қотиришдан қутиласиз. Табиийликка кўникиб, ортиқча ўй-хаёлларга вақт сарфламайсиз.
Изоҳ (0)