Кўз атрофи энг ингичка ва нозик теридан иборат. Унинг учун тананинг бошқа териларига нисбатан алоҳида парвариш лозим. Аммо кўпчилик бунга унча ҳам аҳамият бермайди. Натижада кўз атрофида ажинлар пайдо бўлиши кузатилади. Албатта, ёш билан боғлиқ бўлган ажинлардан сақланиб бўлмайди, шунингдек, уларнинг яна бир сабаби табассумдир. Шунга қарамай, кўз атрофидаги терини парвариш қилишда учрайдиган хатолар мавжуд бўлиб, улар ҳар қандай инсонга муддатидан аввал қаришга имкон беради.
Жуда иссиқ ёки совуқ сув билан ювиш
Бу ҳар қандай ўзига ғамхўрлик қилувчи аёлнинг хатоси. Кўз атрофи терисини ювишда сув хона ҳарорати ёки 23—24 даража бўлиши керак. Аммо музли ёки жуда қайноқ сув аксинча зиён етказиши мумкин. Баъзида муз бўлаклари кўз остига қўйилади, аммо бу ҳеч қандай парвариш турига кирмайди. Тери бундан шунчаки азият чекади. Худди шу ҳол иссиқ сувга ҳам тегишли бўлиб, бу орқали тери шикастланиши ва ажин тушиши кузатилади.
Кўздаги бўёқларни ювишда махсус воситадан фойдаланиш керак
Макияжни ювишда қўлланиладиган махсус гель ва кўпиклар юз териси учун мўлжалланган ва кўз атрофи учун фойдаланмаслик ҳақида кўрсатма мавжуд. Ушбу маълумот ҳақиқатан ҳам фойдали бўлиб, уни эътиборсиз қолдириш мумкин эмас. Бутун юзнинг териси ва кўз атрофидаги нозик терига алоҳида парвариш керак. Шунинг учун кўз қовоғидаги косметик воситаларнинг қолдиқларини махсус кўпик билан тозалаш керак.
Кўз атрофи учун юз кремидан фойдаланиш мумкин эмас
Худди макияжни тозалаш каби юз учун мўлжалланган кремдан кўз атрофи териси учун фойдаланиш мумкин эмас. Гарчи юз креми қанчалар сифатли ва қиммат бўлмасин, кўз атрофи териси учун алоҳида махсус воситадан фойдаланиш тавсия этилади.
Терини намлантиришга кўпроқ эътибор бериш керак
Ажинлар пайдо бўлишининг яна бир сабаби — терининг қуришидир. Яхши намланган тери силлиқ ҳолатда бўлади, бу кўз атрофи териси учун жуда муҳим. Чунки ушбу соҳада мушак ва териости ёғлари мавжуд эмас, шунинг учун қуришга кўпроқ мойил. Махсус намлантирувчи воситадан кунига икки маротаба, пардоздан аввал ва уни тозалагандан кейин суриш керак.
Махсус кремлардан нотўғри фойдаланиш
Кўз атрофига кремларни енгил ҳаракат билан суриш керак. Терини чўзиш орқали эмас, балки бармоқ учида аста уриш орқали амалга ошириш лозим. Шунингдек, ҳаракатлар ички бурчакдан ташқи бурчакка, кўз атрофи ҳудуди ва яна ташқи томондан ички бурчак томон бўлиши керак. Ушбу оддий енгил ҳаракатлар қон айланишини яхшилаб, терини янада мустаҳкамлайди.
Қуёш нуридан ҳимоя қилувчи кўзойнак тақиш лозим
Кўзойнаксиз қуёш нурлари остида нафақат кўзлар, балки бутун юз қисмини қийнашга тўғри келади. Шу орқали кўз атрофи териси ғижимланишга кўникади. Шунинг ортидан ажинлар осонгина пайдо бўлади. Олдини олиш учун ҳамиша кўзойнакдан фойдаланиш керак.
Макияж билан ухлаш одатидан воз кечиш керак
Ҳамма юзда косметик воситалар билан ухлаш мумкин эмаслигини жуда яхши билади. Сабаби тунда тери ишлаб чиқарувчи ёғлар ва косметик воситалар аралашиб, зарарли моддаларга айланади ва терига салбий таъсир ўтказиши мумкин. Юзда турли хил тошмалар, доғ ва ажин пайдо бўлишига имкон бермаслик учун иложи борича юзни косметик воситалардан халос қилган ҳолда уйқуга кетиш тавсия этилади.
Изоҳ (0)