Эстонияда пандемия сабаб қўшимча чекловлар жорий этилди

Эстонияда 5 декабрь, шанба куни коронавирус пандемияси сабаб қўшимча чекловлар жорий этилди, дея хабар бермоқда «Интерфакс».

Қайд этилишича, мамлакатдаги дўкон ва сервис хўжаликларининг савдо ҳамда хизмат кўрсатиш хоналарида бир вақтнинг ўзида ушбу жойлар умумий сиғимининг 50 фоизидан кўп миқдорда одам бўлиши мумкин эмас. Шу билан бирга, одамлар «2 + 2» қоидаларига риоя қилишлари керак. Бунда одамлар максимал иккитадан бўлиб ўзаро икки метр масофа сақлаб юришлари керак.

Умумий овқатланиш, кўнгилочар ва оммавий тадбирлар ўтказиладиган жойларда бўлишга соат 22:00 гача рухсат берилади.

Шунингдек, соат 22:00 дан 06:00 гача умумий овқатланиш, кўнгилочар ва томошабинлар учун стационар ўриндиқлар бўлмаган оммавий тадбирларни ўтказиш жойлари ташриф буюрувчилар учун ёпиқ бўлиши керак. Умумий овқатланиш жойлари харидорларга озиқ-овқат маҳсулотларини сотиш ёки озиқ-овқат етказиб бериш учун курьерлик ва транспорт хизматларини кўрсатишга рухсат берилади.

Бундан ташқари, юқоридаги жойларда шахсий тадбирлар ўтказилишига йўл қўйилмайди. Ижтимоий ва спорт тадбирларига ҳам худди шундай талаблар қўйилади.

Маълумот учун, 1,3 миллион аҳолига эга бўлган Эстонияда пандемия бошланганидан буён 5 декабргача 499,5 мингга яқин коронавирус таҳлили учун тест топширилган. Улардан 13 939 таси (2,8 фоизи) мусбат натижа кўрсатган. Сўнгги 14 кун ичида жами касалланиш 100 минг кишига 366,37 тани ташкил этди.

COVID-19 касалхоналарида 224 киши даволанмоқда, улардан 11 нафари сунъий нафас олдириш ускунасига уланган. Пандемия бошланганидан бери Эстонияда коронавирус ташхиси қўйилган 125 киши вафот этган.

Аввалроқ Германияда коронавирус билан боғлиқ чекловлар 10 январгача узайтирилиши режалаштирилаётгани, Латвияда COVID-19 туфайли жорий қилинган фавқулодда ҳолат режими 11 январгача узайтирилгани ҳамда Москвада коронавирус туфайли чеклов чоралари 15 январгача узайтирилгани ҳақида хабар берилганди.