Роналду, Месси, Пеле, Дрогба ва Бекҳэм. Жиддий касалликларни енгиб ўтган таниқли футболчилар

Футбол мухлислари майдонда югуриб юрган бақувват ва кучли ўйинчиларни кўради ва уларни ҳар доим шундай бўлган деб ўйлайди. Бироқ чарм тўп усталари орасида шундай футболчилар борки, улар ўтмишда нафақат оддий инсон, балки анчайин жиддий бўлган касалликларни ҳам бошдан ўтказган. Қуйида айнан мана шундай иродали юлдуз футболчилар ҳақида фикр юритилади.

Лионель Месси

Қўлга киритилган «Олтин тўп»лар сони (6 та) бўйича рекордчи ватани Аргентинада оддий чой сотувчиси бўлиб ўтиб кетиши, футбол эса у каби даҳодан мосуво бўлиши мумкин эди. Гап шундаки, Лео соматотропин (ўсиш) гормони етишмаслигидан азият чекарди, даъволаш курси эса ойига 900 доллар турарди. Айнан шундай вазиятда Мессига омад кулиб боқади: унинг нечоғлик истеъдодли эканини каталониялик скаутлар пайқаб қолади ва унинг отасини фарзандини Барселонага кўрикка олиб келишга кўндиради. Ёш болакайнинг қобилияти клуб мутасаддиларида шунчалик яхши таассурот қолдирдики, улар Мессининг даволанишига ҳомийлик қилишни ўз зиммасига олади (йилига 90 минг евро). Шу тариқа аргентиналикнинг бўйи 169 сантиметргача, ўзи эса дунёнинг энг яхши футболчиси мақомигача ўсади.

Криштиану Роналду

Роналду 15 ёшдалигида шифокорлар уни уч-тўрт ойга футболни унутишга мажбур қилади: оғир жисмоний юкламалар оқибатида тахикардия (юрак билан боғлиқ муаммолар) юзага келади.

«Шукрки, касаллик енгил босқичда ўтди. У жарроҳлик амалиётига эҳтиёж сезмади. Касаллик билан лазер ёрдамида курашилди», –  деганди Роналдунинг «Спортинг» академиясидаги мураббийи Луис Мартинес. Бугунги кунда эса Криштиану нафақат яхши тўпурар, балки дунёнинг энг кучли атлети ҳамдир. «Олтин тўп»ни қўлга киритиш борасида эса у фақатгина Лионель Мессидан (Роналду 5 марта мазкур совринни ўзиники қилган) орқада, холос.

Тиаго Сильва

Бразилиялик ҳимоячи 2005 йилда Москванинг «Динамо»сида тўп сурган. Бу пайтгача 20 ёшли Сильва «Порту»нинг иккинчи жамоасидан бошқа жойда ўйнамаганди. Москвадаги саргузаштлар Тиаго учун даҳшатли туш каби ўтади: дастлаб йигитча ўқув машғулотларида йўталди, текширувлардан сўнг эса унда сил (туберкулёз) касаллиги аниқланди.

«Мен касалхонада ётардим ва ўзимни оч қолган одамдек ҳис қилардим. Онам касал одамга ўхшамаслигимни айтарди, лекин мен қимирлай олмасдим. Вақти-вақти билан шифокор менга уколлар қилар, мен эса кунига 10–15 дона таблетка истеъмол қилардим. Ўша вақтларни тез-тез эслаб тураман. Ўшанда футболни тарк этиш ҳақида ўйлагандим», – деганди Сильва касалликни бошдан ўтказгани ҳақида.

Спорт билан хайрлашиш ўрнига Сильва ватанига қайтиб, бир неча йил «Флуминенсе» жамоасида ҳаракат қилди, шундан кейин дастлаб, «Милан» сафида Италия, сўнгра ПСЖ билан Франция чемпионатида ғолиб бўлди. Ҳозирда Тиаго Лондоннинг «Челси» клуби шарафини ҳимоя қилади ва дунёнинг энг яхши ҳимоячиларидан бири ҳисобланади.

Дэвид Бекҳэм

Инглиз футболи афсонасига болалигида астма ташхиси қўйилган, аммо 2009 йилгача бу ҳақида ҳеч ким билмасди. Дэвид касалликка мослашиб, нафас олиш машқларини бажарар ва яширинча ингалятордан фойдаланарди.

Кунлардан бир кун Бекҳэмнинг тиббий аксессуар ушлаб турган сурати матбуотда пайдо бўлади. Дэвиднинг ўзи эса интервьюларидан бирида шундай деганди: «Ҳа, мен астма касаллигидан кўп йиллардан бери азият чекаман. Нега мен бу ҳақида ҳеч қачон гапирмаганман? Чунки бунга сабаб бўлмаган. Агар бу сизни ташвишга солаётган бўлса, менда бундай касаллик бор».

Эдгар Давидс

Ўтган асрнинг тўқсонинчи йиллари ўрталарида нидерландиялик Питбул лақабини олган Давидс бошидан глаукомани (кўзнинг хиралашиши) келтириб чиқарган жароҳат олади. У дастлаб чап кўзида, уч йилдан сўнг эса ўнг томонида операция қилинади.

Шунда у вазиятдан чиқиш йўлини топиб, ФИФАдан ҳимоя кўзойнакларида ўйнашга рухсат сўрайди. Ўз навбатида расмийлар ҳам бунга розилик беради ва Эдгар кўзойнак таққан биринчи ва ягона футболчига айланади. Кўзойнакли Давидснинг фаолияти яна 15 йил давом этади ва Италия чемпионати ҳамда Кубогида ғолибликни қўлга киритади.

Дидье Дрогба

Дидье 14 ёшида биринчи марта безгакка чалинганди, аммо бўлажак ҳужумчи тезда оғир касалликдан фориғ бўлади. Унинг ушбу касалликка иккинчи марта чалиниши эса 2010 йилнинг охирида рўй беради. Дрогба бир ой давомида ўзини ёмон ҳис қилади ва шундан кейингина шифокорлар бунга безгак сабабчи бўлганини аниқлайди.

«Бу даҳшатли эди. Биз унинг буни (касаллик назарда тутилмоқда) қаерда юқтириб олганини тасаввур ҳам қила олмаймиз. Дидье спорт формасини ва аввалги кучини йўқотди», – деганди «кўклар»нинг ўша пайтдаги бош мураббийи Карло Анчелотти. Дрогба уч ой даволанди, шундан сўнг ўзига келди ва хасталигидан атиги бир ярим йил ўтиб, «Челси» ғолиб чиққан 2011/12 йилги Чемпионлар Лигаси финалининг асосий қаҳрамонларидан бирига айланди.

Пеле

Футбол қироли Пеленинг 1289 голи, мундиаллардаги ғалабалари (Пеле 3 марта Жаҳон чемпионлигини қўлга киритган) ҳақида кўпчилик эшитган. Аммо унинг ўспиринлик пайтида қандли диабетнинг 1-тури билан курашгани аксарият футбол ихлосмандларига номаълум бўлса керак. У таслим бўлмайди, парҳез тутишни бошлайди ва 17 ёшидаёқ ўзининг биринчи Жаҳон Кубогини боши узра баланд кўтаради. Қандли диабет билан енгил жисмоний машқлар қилиш тавсия этилади, аммо бразилиялик кеча-ю кундуз шуғулланарди ва айнан шу нарса уни қирол даражасига олиб чиққан.

Начо

12 ёшида «Реал» футболчиси шифокорлардан «Сенга футбол билан шуғулланишга рухсат йўқ», деган гапни  эшитади ва бу «янгилик» йигитчани чуқур тушкунликка солиб қўяди. Гап шундаки, Начода қандли диабетнинг 1-тури аниқланганди. Вақт ўтиши билан унга спорт билан шуғулланишга рухсат берилади, аммо у соғлиғига алоҳида эътибор қаратиши, шакар ва овқатланиш рационини доимий равишда назорат қилиш лозим эди. Ўшандан бери Чемпионлар Лигасининг тўрт карра ғолиби ҳар овқат вақтида шприсни олиб, ўзига инсулин юборади. Начонинг ўзи «Реал» академиясида ушбу ҳолат барчанинг эътиборини тортгани, аммо бу уни янада кучлироқ қилганини айтади. Испаниялик ҳар доим ўз касаллигининг яхши томонларини қидиришга ҳаракат қилади.

«Спорт билан шуғулланганингизда, касалликнинг барча ноқулайликлари осонлашади, бу менга фаолиятимда ҳам ёрдам берган. Тўғри овқатланиш ва дам олиш – топ-даражадаги спортчи учун зарур омиллар ҳисобланади», – дейди Начо.