Шимолий Кореяда карантин қоидаларини бузган эркак омма олдида отиб ўлдирилди

Шимолий Кореяда бир эркак «фавқулодда карантин чораларини» бузганлиги сабабли омма олдида қатл этилди. Бу одамларни қўрқитиш ва уларни COVID-19 сабабли карантинга қатъий амал қилишга мажбурлаш мақсадида қилинган. Бу ҳақда «Korrespondent.net» хабар берди.

Расмийлар КХДРда коронавирус билан касалланиш ҳолатлари мавжуд эмаслигини даъво қилишига қарамасдан, Корея ишчилар партиясининг Марказий қўмитаси карантин чораларини «ўта юқори даражадаги фавқулодда карантин чоралари» даражасига оширди. Бу ҳақда Хитой билан чегарада жойлашган Шимолий Пёнган вилоятининг фуқароси RFА нашри манбасига гапириб берган.

«Улар чегара зонасида маҳаллий аҳолини қўрқитиш учун ўқ отиш билан омма олдида қатл уюштирди, чунки чегаранинг нариги томонида одамлар билан жуда кўп алоқа бўлган, шу қаторда кўплаб контрабанда бўлган», — дейди манба.

Қатл этилган 50 ёшли эркак карантинни бузганлик ва Хитойдан ноқонуний равишда контрабанда олиб келганликда айбланган. У 28 ноябрь куни отиб ташланган.

Манба омма олдидаги қатлга гувоҳ бўлмаган, аммо уни қатл маросимида қатнашганлардан бири билан муҳокама қилган.

«Ҳар доим одамлар тирикчилик учун зарур нарса етишмаётганидан шикоят қилса, ҳукумат уларни қатл этиш ёки сиёсий қамоқ лагерларига жўнатиш билан таҳдид қилиб, уларнинг овозини ўчиришга ҳаракат қилади», — деб ёзган RFА ўз манбасига асосланиб.

Аввалроқ Шимолий Кореяда камида икки нафар амалдор COVID-19 коронавирус пандемияси сабаб юзага келган иқтисодий танглик туфайли қатл қилингани ҳақида хабар берилганди.