Товуқ гўшти ва анор доначаларини қўшиб «холодец» тайёрлаймиз

Ушбу таом нафақат ажойиб мазаси, балки чиройли кўриниши билан ҳам дастурхонга байрамона кайфият бағишлайди.

Керакли маҳсулотлар:

• Сабзи − 1 дона;
• Пиёз  − 1 дона;
• Товуқ сони − 1 килограмм;
• Дафна япроғи − 3 дона;
• Желатин − 40 грамм;
• Анор − 1/2 дона;
• Яшил нўхат − 150 грамм;
• Йирик мурч, туз ва зираворлар.

1. Сабзи ва пиёз тозаланади, товуқ сонлари териси олиниб, сабзавотлар билан биргаликда сувда қайнатилади.
2. Сўнг пишган маҳсулотлар яна бошқа идишга олиниб, тахминан 2 литр сувда 1 соат қайнатилади ва кўпиклардан тозаланади.
3. Оловни ўчиришдан 15 дақиқа олдин дафна япроғи, туз ва зираворлар солинади.
4. Тайёр бўлган бульондан 800 мл сузилади. Товуқ гўшти суякларидан ажратилади. Гўшт ва сабзавотлар тўртбурчак шаклда тўғралади.
5. Желатин қайноқ бульонга солинади ва 20 дақиқага қўйилади. Желатин тўлиқ эримагунча паст оловда қизитилади. Аммо бульон қайнаши мумкин эмас.
6. Нўхат доналари оддий тузли сувда 2-3 дақиқа қайнатилади ва ранги ўзгармаслиги учун дарҳол совуқ сув билан ювилиб, тўғралган гўшт ва сабзавотлар билан аралаштирилади.
7. Анор доначалари тозаланиб, қолипнинг энг таг қисмига жойлаштирилади. Устидан бироз бульон қуйилади ва музлаткичга 5-7 дақиқага қўйилади.
8. Бироздан сўнг товуқ гўштли аралашма қотиб турган бульон устидан жойлаштирилади ва яна бульон қуйилади. Сўнгра музлаткичга 4-5 соатга қўйилади.
9. Тайёр бўлган «холодец»лар қолипдан эҳтиёткорлик билан чиқариб олинади. Таъбга кўра кўкатлар билан безатилади. Ёқимли иштаҳа!