Тил гўштидан тушёнка тайёрлаб кўринг

Помидор соусида гўшт янада юмшоқ бўлиб пишади ва уни картошка  ажойиб таъм билан бойитади.

Керакли маҳсулотлар:

• Тил гўшти – 1 дона;
• Сув – 1500-2000 мл;
• Бульон – 200-300 мл;
• Пиёз – 1 дона;
• Саримсоқ – 2-3 бўлак;
• Помидор соуси – 150-200 грамм;
• Кориандр – 3-5 япроқ;
• Орегано – ½-1 чой қошиқ;
• Картошка – 2-3 дона;
• Булғор қалампири – 1 дона;
• Помидор – 1 дона;
• Ёғ, туз ва зираворлар.

1. Тил гўштига туз сепилиб, икки соат мобайнида қайнатиб олинади.
2. Гўшт пишганидан сўнг совитишга қўйилади.
3. Тил гўшти қайнаган шўрва устидан бульон қўшилади.
4. Товада ёғ қизитилиб, тил гўшти қизаргунга қадар қовуриб олинади.
5. Сўнгра паррак шаклида тўғралган пиёз ҳам қизаргунича қовуриб олинади. Устидан саримсоқ қўшиб, яна 30 сония давомида қовурилади.
6. Бульон билан биргаликда помидор соуси, тўғралган кўкат ва орегано ҳам товага солинади.
7. Суюқлик қайнаб чиққанидан сўнг тил гўшти солинади. Олов пасайтирилиб, яна 40-50 дақиқа давомида димлаб пиширилади.
8. Картошка ўртача, булғор қалампири ва помидор майдароқ тўғралади. Улар ҳам бульонга солиниб, 15-20 дақиқа пиширилади.
9. Тил гўшти олиб, бўлакланади. Таомга туз ва зираворлар қўшилиб, аралаштирилади ва идишларга сузилади.