Tovuq go‘shti va anor donachalarini qo‘shib “xolodets” tayyorlaymiz

Ushbu taom nafaqat ajoyib mazasi, balki chiroyli ko‘rinishi bilan ham dasturxonga bayramona kayfiyat bag‘ishlaydi.

Kerakli mahsulotlar:

• Sabzi − 1 dona;
• Piyoz  − 1 dona;
• Tovuq soni − 1 kilogramm;
• Dafna yaprog‘i − 3 dona;
• Jelatin − 40 gramm;
• Anor − 1/2 dona;
• Yashil no‘xat − 150 gramm;
• Yirik murch, tuz va ziravorlar.

1. Sabzi va piyoz tozalanadi, tovuq sonlari terisi olinib, sabzavotlar bilan birgalikda suvda qaynatiladi.
2. So‘ng pishgan mahsulotlar yana boshqa idishga olinib, taxminan 2 litr suvda 1 soat qaynatiladi va ko‘piklardan tozalanadi.
3. Olovni o‘chirishdan 15 daqiqa oldin dafna yaprog‘i, tuz va ziravorlar solinadi.
4. Tayyor bo‘lgan bulyondan 800 ml suziladi. Tovuq go‘shti suyaklaridan ajratiladi. Go‘sht va sabzavotlar to‘rtburchak shaklda to‘g‘raladi.
5. Jelatin qaynoq bulyonga solinadi va 20 daqiqaga qo‘yiladi. Jelatin to‘liq erimaguncha past olovda qizitiladi. Ammo bulyon qaynashi mumkin emas.
6. No‘xat donalari oddiy tuzli suvda 2-3 daqiqa qaynatiladi va rangi o‘zgarmasligi uchun darhol sovuq suv bilan yuvilib, to‘g‘ralgan go‘sht va sabzavotlar bilan aralashtiriladi.
7. Anor donachalari tozalanib, qolipning eng tag qismiga joylashtiriladi. Ustidan biroz bulyon quyiladi va muzlatkichga 5-7 daqiqaga qo‘yiladi.
8. Birozdan so‘ng tovuq go‘shtli aralashma qotib turgan bulyon ustidan joylashtiriladi va yana bulyon quyiladi. So‘ngra muzlatkichga 4-5 soatga qo‘yiladi.
9. Tayyor bo‘lgan “xolodets”lar qolipdan ehtiyotkorlik bilan chiqarib olinadi. Ta’bga ko‘ra ko‘katlar bilan bezatiladi. Yoqimli ishtaha!