Месси, Роналду, Марадона ва Роналдиньо. Футбол тарихидаги бетакрор ўйинчилар

Одатда футболни «чиройли ўйин» деб аташади. Дарҳақиқат, бу, нафақат драма, ҳиссиётлар ва олдиндан айтиб бўлмайдиган воқелик, балки индивидуал маҳорат ҳамдир. Баъзан миллионлаб қалбларни забт этиш учун энг зўри бўлиш (зарар қилмайди, албатта) ёки ўнлаб мукофотларни қўлга киритиш шарт эмас – шунчаки бошқаларда йўқ нарсани кўрсата олиш лозим. Футбол тарихида эса ўз услубига эга бўлган ва такрорланмас футболчилар талайгина. Уларнинг ўйинини соатлаб томоша қилиш мумкин ва бу инсонга фақат завқ бағишлайди. Уларнинг фаолияти ва шахсияти ҳақида ёзиш эса ўта мураккаб иш, ишлатилаётган ҳар бир сўз даҳоларнинг мавқейига таъсир ўтказиб қўйгандек туюлаверади. Шунга қарамай, қуйида футбол оламининг энг ёрқин ва ноёб футболчилари ҳақида (эҳтиёткорона) фикр юритилади.

Рене Игита

Рўйхатни барча замонларнинг энг ёрқин дарвозабонларидан бири бўлган Рене Игита очиб беради. «Телба» лақабли Игитани кўпчилик чаён зарбаси орқали яхши танийди. Бироқ у бу зарбасиз ҳам ўзининг профессионал ва жуда кучли дарвозабон эканлигини кўп бор исботлаган.

Деннис Бергкамп

Футбол оламининг «Пикассо»си Деннис Бергкамп ўз ишининг чинакам устаси эди. У нафис паслари ва эпчил финтларидан ташқари, доимо ақл бовар қилмайдиган голлар урар ва шу пайтгача кам сонли инсонларгина амалга ошира оладиган ишларни қиларди. Шундай экан, унинг ушбу рўйхатдан жой олгани ҳеч кимни ажаблантирмаса керак.

Роналдо

Бир пайтлар дунёда фақат битта Роналдо бўлган ва уни бутун дунё энг зўри деб ҳисобларди. Дарҳақиқат, у майдонда шундай ҳаракат қилардики, мухлисларнинг унинг ўйинига тўя олмагандек таассурот уйғонади ва бугунги кунда ҳам Роналдонинг ўйинини ҳар бир футбол ишқибози соғиниши бор гап. 2002 йилги мундиал ғолиби (ўзи) хоҳлагандай гол урадиган ҳужумчилар тоифасидан эди.

Криштиану Роналду

Тарихдаги энг яхши футболчи номи учун абадий даъвогар Криштиану Роналду ўзининг техникаси, чексиз голлари ва ишга бўлган муносабати билан ҳеч кимга ўхшамайди. Шунингдек, у иккинчи қаватда ғайриинсоний ўйин кўрсатади. Унинг жарима зарбаларига эса ортиқча тариф бермаган маъқул.

Пеле

1958 йилги мундиалда бутун дунёга ўз номини танитган Пеле умумий ҳисобда уч марта Жаҳон Кубоги бош совринини қўлга киритган ягона футболчи ҳисобланади. Шунингдек, у урилган голлар сони бўйича ҳам ҳамон биринчиликни ҳеч кимга бергани йўқ. Ундан кейин қандай даражадаги футболчи чиқишидан қатъи назар Пеле доимо футбол қироли бўлиб қолаверади.

Зинедин Зидан

Тўп билан хоҳлаган ишини қила оладиган Зидан нафақат мамлакати термасини Жаҳон чемпиони қилди, балки унинг халқини ҳам бирлаштира олди. Футболни ақл ва совуққонлик билан ўйнаган Зизу бугун Франция қаҳрамони ҳисобланади. Бундан ташқари, у мураббийлик фаолияти билан ҳам бемалол мақтаниши мумкин. Унинг имзолари орасида ўзига хос дриблинг, узатмаларда юқори даражадаги аниқлик ва энг муҳим учрашувлардаги голлар ажралиб туради.

Лионель Месси

«У ҳақида ёзманг, унга таъриф берманг. Шунчаки унинг ўйинини томоша қилинг» – деганди Пеп Гвардиола. Ҳа, бу гаплар ҳақиқат. Барчаси оддий, шунчаки унинг томоша қилиш керак, тамом.

Тўғри, кўпчилик Роналдуни мукаммал ўйинчи ва энг яхши спортчи деб ҳисоблаши мумкин, аммо аргентиналикнинг тўпни олиб юриши, узатмалари ва вазиятларни моҳирлик билан якунлашини сўз билан изоҳлаш жуда қийин. Тан олиш лозим, «Барселона» айнан унинг даврида дунёнинг энг кучли клубига айланди.

Жорж Бест

Эҳтимол, футбол оламидаги илк суперюлдуз Жорж бўлгандир. Бунга сабаб Бест (Best сўзи/фамилияси инглиз тилидан таржима қилинганда энг зўри деган маънони билдиради) фамилиясига монанд равишда ҳам майдонда, ҳам унинг ташқарисида бирдек ажойиб ҳаракат қиларди. Айнан шу орқали уни нафақат футбол мухлислари, балки спортдан анча йироқ одамлар ҳам яхши биларди. «Манчестер Юнайтед» унинг саъй-ҳаракатлари туфайли 1968 йилда ўзининг илк Еврокубогини қўлга киритган.

Диего Марадона

Марадонанинг Пеледан ягона устун жиҳати унинг майдон ташқарисида ҳам у ердагидан-да фаолроқ экани эди. Шунингдек, у «аср голи» ва тарихдаги энг адолатсиз гол муаллифи ҳисобланади. Эътиборга молик тарафи, Марадона ушбу голларнинг ҳар иккаласини  ҳам бир ўйинда (Англияга қарши) урган.

Роналдиньо

Такрорланмас Роналдиньо ҳақиқатан ҳам бошқа даражадаги футболчи ва раққос эди. Бундай дейишга сабаб, у тўп билан шунчаки ҳаракат қилмасди, балки тушунарсиз, аммо жозибали ишларни амалга оширарди. Бразилиялик ҳар доим юзида табассум билан юрар ва майдондаги ҳар бир дақиқадан завқланарди, бу қувонч эса ўз навбатида томошабинларга ҳам ўтарди. Унинг эластик техникаси ҳеч қачон унутилмайди. Роналдиньо шунчалик ажойиб футболчи эдики, ҳатто «Реал» мухлислари уни ўрниларидан турганча олқишларди – бу нимани англатишини эса футбол ихлосмандлари жуда яхши билади...