Суарес топиб берган уй, «Ливерпуль» мухлислари пачоқ қилган машина ва миллионлаб даромад. Филиппе Коутиньо қандай ҳаёт кечиради?

«Ливерпуль» сафидаги бир неча муваффақиятли мавсумлардан кейин «Барселона»га йўл олган Филиппе Коутиньо дастлаб Каталонияда омадсизликка учради ва бир мавсум «Бавария»да ижарада ўйнаб келди. 2020/21 йилги мавсумдан бошлаб эса у нисбатан барқарор ўйин кўрсатмоқда ва секин-асталик билан жамоада ўз ўрнига эга бўлиб бормоқда. Бироқ бугун Коутиньонинг фаолияти ва ўйин услуби ҳақида эмас, балки яшаш тарзи, оиласи, даромади ва дўстлари ҳақида фикр юритамиз.

Коутиньо қаерда яшайди?

Коутиньо 2018 йилда «Барселона»га ўтганида ўзи учун турар жой қидириши шарт эмас эди. Унга ҳозирда «Атлетико» шарафини ҳимоя қилаётган «Ливерпуль»даги собиқ жамоадоши Луис Суарес Каталониянинг Кастелдефелсдан уй топиб қўйганди. Уйдан «Барса» базаси ва стадионгача етиб олиш учун, тахминан, ярим соат вақт кетади. Қўшнилар орасида эса Месси, Суарес сингари таниқли футболчилар бор эди.

Коутиньо яшаётган ҳашаматли қасрнинг нархи, тахминан 5–6 миллион еврони ташкил қилади. Иморат шаҳарнинг энг обрўли ҳудудида жойлашган бўлиб, у 750 квадрат метр жойни эгаллаган. Тўрт қаватли ҳашаматли уйда спорт зали, улкан хоналар ва ошхона, шунингдек, кичик шароб омбори, ҳатто лифт ҳам мавжуд. Уйнинг ташқи қисми, яъни ҳовлида ҳовуз, текбол майдон (оёқда ўйналадиган стол тенниси) ва гўзал боғ мавжуд.

Коутиньонинг машиналари

Коутиньо автомобилларининг аниқ сони ҳақида маълумот йўқ. Бироқ бразилияликнинг машиналар тўплами унинг даражасидаги футболчи учун жуда камтар эканлиги маълум. Ярим ҳимоячининг энг қиммат машинаси Aston Martin V8 Vantage бўлиб, унинг қиймати 150 минг долларга баҳоланади.

Шунингдек, бразилиялик футболчида Range Rover, Audi Q7 каби автомобилларни кўриш мумкин.

Бундан ташқари унда Porsche Маcan русумли машинаси бор эди, ушбу автоуловни «Ливерпуль» мухлислари ярим ҳимоячининг «Барселона»га ўтиш истаги борлиги ҳақида хабар топгач тошбўрон қилади.

Коутиньонинг шахсий ҳаёти

Коутиньо ўз қасрида рафиқаси Айне билан яшайди. Футболчи бўлажак рафиқаси билан 14 ёшида танишган. Ўспирин зиёфатларнинг бирида қизни бир кўришда ёқтириб қолади. Узоқ йиллик муҳаббатдан сўнг жуфтлик 2012 йилда турмуш қуришга қарор қилади.

Бахтли оила ҳозирда Мария ва Эсмералда исмли қизалоқларни вояга етказмоқда. Филиппе содиқ турмуш ўртоқ ва ғамхўр ота бўлиб, имкон қадар оиласи билан кўпроқ вақт ўтказишга ҳаракат қилади. Ўз навбатида Айне ҳам фарзандлари билан бирга ўйинларга келиб, Коутиньони қўллаб-қувватлаб туришни канда қилмайди.

Коутиньонинг даромади қанча?

Коутиньонинг «Барселона»даги бир йиллик маоши, тахминан, 13,5 миллион еврони ташкил қилади.

Бундан ташқари, унинг Nike компанияси билан шартномаси мавжуд. У бу орқали йилига 2 миллион еврони қўлга киритади. Шунингдек, футболчи мунтазам бўлмаса-да, турли хил рекламаларда суратга тушиш орқали ҳам яхшигина даромад кўради.

Коутиньонинг дўстлари ким?

Коутиньо ҳар доим майдон ва унинг ташқарисида ўзининг камтарлиги ва намунали хулқи билан ажралиб турган. Юқорида таъкидланганидек, у кўп вақтини оиласи билан ўтказади. Бироқ шунга қарамай, бразилиялик футбол оламида ҳам бир қанча дўст орттиришга муваффақ бўлган.

Унинг энг яқин дўстларидан бири Луис Суарес бўлиб, айнан унинг Коутиньога уй топиб бергани ҳам бежиз эмас.

Шунингдек, у «Ливерпуль»да тўп сурган маҳал Муҳаммад Салоҳ билан илиқ муносабатларга эга бўлган. Улар бугунги кунда ҳам қўнғироқлашиб туради.

Коутиньонинг яна бир дўсти Неймар бўлиб, улар биргаликда Бразилиянинг турли ёш тоифаларидаги терма жамоалари шарафини ҳимоя қилган.