«Истанбул Башакшеҳир» ярим ҳимоячиси Ирфон Жан Каҳвежи Чемпионлар Лигаси 5-тури доирасида «Лейпциг»га қарши ўйинда (3:4) ҳет-трик муаллифига айланди.
Бироқ унинг учта голи ҳам жамоасининг ғалабаси учун етарли бўлмади. Шу тариқа Каҳвежи ЕЧЛда ҳет-трик қайд этиб, ўша ўйинда мағлубиятга учраган тарихдаги учинчи футболчига айланди, дея хабар қилмоқда Opta.
Бундан аввал Роналдо 2003 йил «Реал» билан «Манчестер Юнайтед»га қарши баҳсда (3:4) ва Гарет Бэйл 2010 йил «Тоттенҳэм» сафида «Интер»га қарши ўйинда (3:4) ушбу натижани қайд этган.
Шунингдек, Каҳвежи учта голнинг барчасини жарима майдони ташқарисидан йўлланган зарбалар орқали киритди. Сўнгги бор Уэйн Руни 2004 йили «Фенербаҳче»га қарши баҳсда жарима майдони ташқарисидан йўллаган зарбалар орқали ҳет-трик қайд этганди.
Эслатиб ўтамиз, Ирфон Чемпионлар Лигасининг 5-тур якунлари бўйича ҳафтанинг энг яхши ўйинчи номига даъвогарлар рўйхатидан ўрин олди. Шунингдек, унинг «Лейпциг» дарвозасига киритган учинчи тўпи ҳафтанинг энг чиройли голи бўлишга даъвогар.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)