Путин кейинги ҳафтадан бошлаб коронавирусга қарши вакцинация бошлашни буюрди

Россия президенти Владимир Путин бош вазир ўринбосари Татяна Голиковага келаси ҳафта коронавирусга қарши кенг кўламли эмлашни бошлашни буюрди. Бу ҳақда «РИА Новости»га таяниб, Meduza хабар берди.

Қайд этилишича, Путин Голикова ва ҳукумат раҳбари Михаил Мишуцин билан COVID-19’га қарши препаратлар ишлаб чиқариш масаласини муҳокама қилган.

«Биламан, бизда икки миллиондан ортиқ доза вакцина ишлаб чиқарилган ёки яқин бир неча кунда ишлаб чиқарилади. Дунёда биринчи бўлиб рўйхатдан ўтказилган коронавирусга қарши ‘Спутник V’ вакцинаси ҳам шу даражага етказилади», — деган Путин.

https://twitter.com/Кремлinpool_RIA/status/1334131513143816199

Вакцинация шифокорлар ва ўқитувчилардан бошланади ва у ихтиёрий ҳамда бепул бўлади.

Россияда иккита вакцина рўйхатдан ўтказилган: Гамалея маркази томонидан ишлаб чиқилган «Спутник V» ва Новосибирскнинг «Вектор» маркази томонидан яратилган «ЭпиВакКорона». Ҳар иккала препарат учинчи синов босқишида ва у ҳали давом этмоқда. «Спутник V» ишлаб чиқарувчилар унинг 95 фоиз самадорлигини маълум қилган.