Тошкентда ЙПХ ходимини калтаклаган икки судья лавозимидан олинди, уларнинг шеригига ҳайфсан берилди

Жиноят ишлари бўйича Тошкент вилояти судининг уч нафар судьяси октябрь бошида Тошкентга келиб, маст ҳолда ЙПХ ходимлари билан жанжаллашиб, улардан бирига тан жароҳати етказган. Улардан икки нафари жамиятда юриш-туриш одобига риоя этмагани учун ишдан бўшатилган, яна бир нафарига нисбатан ҳайфсан берилган. Бу ҳақда «Gazeta.uz» хабар қилмоқда.

Маълум қилинишича, Тошкент вилоятининг уч нафар судьяси Паркент туманидан пойтахтнинг «Улфатлар» кафесига келиб, алкоголь истеъмол қилган. Ортга қайтишда эса ЙПХ инспекторлари тўхтатиб, маст ҳолда транспорт воситасини бошқарганлик учун маъмурий баённома расмийлаштирган. Бунга қаршилик кўрсатиб, икки нафар судья ЙПХ ходимининг бирига тан жароҳати етказади. Бу вақтда учинчи судья ўзига муаммо орттирмаслик нуқтайи назаридан воқеа жойидан кетиб қолади.

Қайд этилишича, 7 октябрь ҳолатига кўра Жиноят ишлари бўйича Тошкент вилояти судьяларининг икки нафари Судьяларнинг одоб-ахлоқ кодекси талабларига риоя этмагани учун ваколати муддатидан илгари тугатилган. Воқеага алоқадор бўлган учинчи судьяга нисбатан эса шерикларини тўғри йўлга бошламагани учун интизомий чора қўлланилган.

Олий судда 30 ноябрь куни ўтказилган анжуманда Коррупцияга қарши курашиш агентлиги директори ўринбосари Умида Тўхташева ҳам мазкур ҳолатга тўхталиб ўтди.

«ЖИБ Тошкент вилояти судьялари спиртли ичимликлар истеъмол қилиб, дам олишдан қайтаётганларида Паркент тумани ИИБ ЙҲҲБ ходимлари томонидан судья Р.Қ. автомашинаси тўхтатиб текширилганда, унинг маст ҳолатда транспорт воситасини бошқариб келаётгани аниқланган. ЙҲХБ ходими томонидан маъмурий баённома расмийлаштириш жараёнида судья Р.T. унга қаршилик кўрсатиб, унинг хизмат кийимини йиртиб, енгил тан жароҳати етказган», — деди агентлик вакили.

Умида Тўхташева, шунингдек, агентликка келиб тушаётган мурожаатларнинг аксарияти суд қарорлари юзасидан эканини маълум қилди.

«Агентлик ташкил этилганидан бери бизга келаётган мурожаатларни таҳлил қилганимизда, уларнинг энг кўп қисми, яъни 20 фоизи суд қарорлари юзасидан келиб тушганини кўришимиз мумкин», — деди Умида Тўхташева.

Ўз навбатида, Олий суд матбуот хизмати мазкур ҳолатларга аниқлик киритиш мақсадида 2020 йилнинг 11 ойи мобайнида ўзини муносиб тутмаган судьяларга нисбатан кўрилган чоралар ҳақида ахборот берди.

Олий суд хабарида таъкидланишича, 2020 йилнинг 11 ойи мобайнида ўз фаолиятида камчиликларга йўл қўйган 27 нафар судья интизомий жавобгарликка тортилган, шунингдек, 8 нафар судьянинг ваколати муддатидан илгари тугатилган.

Аввалроқ Сурхондарёда «Тўхташ тақиқланади» белгиси остида қолдирилган ИИБга қарашли Lacetti ҳамда Captiva’га жарима белгилангани, Оҳангаронда тўхтатилган ҳайдовчига «масхарабозлик қилган» ЙПХ ходими лавозимидан озод қилингани ҳамда Урганч туманлараро суди судьяси пора билан қўлга тушгани ҳақида хабар берилганди.