Jinoyat ishlari bo‘yicha Toshkent viloyati sudining uch nafar sudyasi oktabr boshida Toshkentga kelib, mast holda YPX xodimlari bilan janjallashib, ulardan biriga tan jarohati yetkazgan. Ulardan ikki nafari jamiyatda yurish-turish odobiga rioya etmagani uchun ishdan bo‘shatilgan, yana bir nafariga nisbatan hayfsan berilgan. Bu haqda “Gazeta.uz” xabar qilmoqda.
Ma’lum qilinishicha, Toshkent viloyatining uch nafar sudyasi Parkent tumanidan poytaxtning “Ulfatlar” kafesiga kelib, alkogol iste’mol qilgan. Ortga qaytishda esa YPX inspektorlari to‘xtatib, mast holda transport vositasini boshqarganlik uchun ma’muriy bayonnoma rasmiylashtirgan. Bunga qarshilik ko‘rsatib, ikki nafar sudya YPX xodimining biriga tan jarohati yetkazadi. Bu vaqtda uchinchi sudya o‘ziga muammo orttirmaslik nuqtayi nazaridan voqea joyidan ketib qoladi.
Qayd etilishicha, 7-oktabr holatiga ko‘ra Jinoyat ishlari bo‘yicha Toshkent viloyati sudyalarining ikki nafari Sudyalarning odob-axloq kodeksi talablariga rioya etmagani uchun vakolati muddatidan ilgari tugatilgan. Voqeaga aloqador bo‘lgan uchinchi sudyaga nisbatan esa sheriklarini to‘g‘ri yo‘lga boshlamagani uchun intizomiy chora qo‘llanilgan.
Oliy sudda 30-noyabr kuni o‘tkazilgan anjumanda Korrupsiyaga qarshi kurashish agentligi direktori o‘rinbosari Umida To‘xtasheva ham mazkur holatga to‘xtalib o‘tdi.
“JIB Toshkent viloyati sudyalari spirtli ichimliklar iste’mol qilib, dam olishdan qaytayotganlarida Parkent tumani IIB YHHB xodimlari tomonidan sudya R.Q. avtomashinasi to‘xtatib tekshirilganda, uning mast holatda transport vositasini boshqarib kelayotgani aniqlangan. YHXB xodimi tomonidan ma’muriy bayonnoma rasmiylashtirish jarayonida sudya R.T. unga qarshilik ko‘rsatib, uning xizmat kiyimini yirtib, yengil tan jarohati yetkazgan”, — dedi agentlik vakili.
Umida To‘xtasheva, shuningdek, agentlikka kelib tushayotgan murojaatlarning aksariyati sud qarorlari yuzasidan ekanini ma’lum qildi.
“Agentlik tashkil etilganidan beri bizga kelayotgan murojaatlarni tahlil qilganimizda, ularning eng ko‘p qismi, ya’ni 20 foizi sud qarorlari yuzasidan kelib tushganini ko‘rishimiz mumkin”, — dedi Umida To‘xtasheva.
O‘z navbatida, Oliy sud matbuot xizmati mazkur holatlarga aniqlik kiritish maqsadida 2020-yilning 11 oyi mobaynida o‘zini munosib tutmagan sudyalarga nisbatan ko‘rilgan choralar haqida axborot berdi.
Oliy sud xabarida ta’kidlanishicha, 2020-yilning 11 oyi mobaynida o‘z faoliyatida kamchiliklarga yo‘l qo‘ygan 27 nafar sudya intizomiy javobgarlikka tortilgan, shuningdek, 8 nafar sudyaning vakolati muddatidan ilgari tugatilgan.
Avvalroq Surxondaryoda “To‘xtash taqiqlanadi” belgisi ostida qoldirilgan IIBga qarashli Lacetti hamda Captiva’ga jarima belgilangani, Ohangaronda to‘xtatilgan haydovchiga “masxarabozlik qilgan” YPX xodimi lavozimidan ozod qilingani hamda Urganch tumanlararo sudi sudyasi pora bilan qo‘lga tushgani haqida xabar berilgandi.
Izoh (0)