«Асосли бўлса, матбуот бу ҳақда ёзишга ҳақли». Ўзбекистондаги элчихоналар АОКА ҳаракатига муносабат билдирди

БМТнинг Ўзбекистондаги доимий координатори Хелена Фрэйзер ва қатор хорижий давлатларнинг Тошкентдаги элчиларида мамлакатдаги мустақил онлайн-ОАВга Президент администрацияси ҳузуридаги Ахборот ва оммавий коммуникациялар агентлигига келган огоҳлантириш хатларига муносабат билдирди, деб ёзади «Gazeta.uz».

Аввалроқ «Gazeta.uz», «Daryo.uz», «Podrobno.uz» коронавирус статистикасига шубҳа билдиргани ва ўз материалларини расмий идоралар билан боғланиб, аниқлик киритмагани сабаб, «Kun.uz» эса ижтимоий тармоқ фойдаланувчиларининг газ ва электр таъминоти муаммосига оид изоҳларини эълон қилгани учун огоҳлантириш олганди. АОКАнинг маълум қилишича, нашр қонунчилик талабларига мос келмайдиган ахборотни тарқатган.

Хелена Фрэйзер Twitter’даги иккита постида БМТ Бош котиби Антониу Гутерришнинг май ойида бўлиб ўтган Матбуот эркинлиги куни шарафига «фактлар ва таҳлилий маълумотлар тақдим этгани, раҳбарларнинг барча соҳаларда жавобгарлигини таъминлагани ва расмийларга ҳақиқатни гапиргани учун» ОАВга миннатдорчилик билдирган сўзларини эслатди.

«Мен ушбу масалалар ва ушбу баёнот ҳақида [‘Kun.uz’, ‘Gazeta.uz’] ва бошқа оммавий ахборот воситалари атрофидаги сўнгги воқеаларни инобатга олган ҳолда мулоҳаза юритяпман. Президент Мирзиёев таъкидлаганидек, матбуот эркинлиги барқарор ривожланишга эришиш ва Ўзбекистон ҳукумати томонидан амалга оширилаётган ислоҳотларни амалга ошириш учун жуда муҳимдир», — деди Хелена Фрэйзер.

АҚШнинг Тошкентдаги элчиси Дениел Розенблюм: «Ахборот ва оммавий коммуникациялар агентлигининг мустақил оммавий ахборот воситаларига босим ўтказиш билан боғлиқ сўнгги ҳаракатларидан кўнглим қолди», — деб ёзган.

«Ўзбекистоннинг улкан ислоҳотлари муваффақиятга эришиш учун эркин ва очиқ матбуотга муҳтож. АОКА босими бунга тўғри келмайди», — деди у.

«АОКА яқинда оммавий ахборот воситаларининг ривожланишини қўллаб-қувватлашга бўлган муносабатини ўзгартирганлигини кўриш ачинарли. Кучли, эркин оммавий ахборот воситаларисиз демократик жамият қуриб бўлмайди», — деб ёзган Буюк Британия элчиси Тим Торлот.

Германиянинг Ўзбекистондаги элчихонасининг ўзбек тилидаги бир қатор твитларида элчи Гюнтер Оверфелд «Ахборот ва оммавий коммуникациялар агентлиги томонидан ‘Kun.uz’, ‘Gazeta.uz’ ва бошқа оммавий ахборот воситаларининг танқидидан ҳайратга тушгани» айтилмоқда.

«Агар матбуотда газ ва электр таъминоти хизматларининг ёмон ишлашини жамоатчилик танқид қилса, бу асосли бўлса, матбуот бу ҳақда ёзишга ҳақлидир. Бу давлат агентлиги томонидан оммавий ахборот воситаларини танқид қилиш учун сабаб эмас. Матбуот ўз вазифасини фақат жамоат муҳокамаларида бажарди», — дейилади элчи муносабатида.