Марказий ҳарбий округ қўмондонлиги ва Жиззах вилояти ҳокимлиги ҳамкорлигида «Янги Ўзбекистон — янгича дунёқараш» шиори остидаги ноанъанавий ҳарбий ватанпарварлик фестивали бўлиб ўтди. Унда саккиз минг нафар аҳоли ва ёшлар иштирок этди. Бу ҳақда «Дарё»га Марказий ҳарбий округи матбуот хизмати маълум қилди.
«Фориш» тоғ полигонида ўтказилган фестивалнинг тантанали очилиш маросимида сўз олганлар мамлакат бўйлаб ўтказилаётган тадбирларнинг мазмун моҳияти ҳамда ҳарбий хизмат муқаддас бурч, юксак шараф эканини таъкидлаб, ёшларни Ватан ҳимоясига руҳлантирувчи фикрлар билдирди.
Вилоят мусиқали драма театри жамоаси ҳамда ҳарбийлар томонидан Жалолиддин Мангубердининг Чингизхон устидан қилган ғалабаси ҳақидаги жонли саҳна кўриниши намойиш этилди. Жиззах ҳамда Самарқанд гарнизони ҳарбий оркестрларининг бадиий-мусиқий чиқишлари бўлиб ўтди.
Фестиваль давомида жанговор техника ва қурол-аслаҳалар, кийим-кечак, озиқ-овқат маҳсулотлари кўргазмаси ҳам ташкил этилди. Дала ўқув майдонида ватан ҳимоячиларининг жанговор қуроллардан фойдаланиб нишонларга қарата аниқ ва тез ўт очиш каби чиқишлари намойиш этилди.
Тадбир давомида миллий кураш, тош кўтариш, арқон тортиш, камондан ўқ отиш, қўл жанги, билак кучини синаш мусобақалари ўтказилиб, кўнгилли ва ишқибоз чавандозлар улоқ кўпкари, от чоптириш ўйинларида соврин учун курашди.
Мудофаага кўмаклашувчи «Ватанпарвар» ташкилотининг ҳарбий-спорт техникалари, само узра парвоз қилган самолётлар, кинология ва кавалерия қўшинлари чиқиш қилди.
Марказий ҳарбий округи қўмондонлиги ташаббуси билан Ўзбекистонда иккинчи маротаба тоғ ён бағрида овчилар ва ҳарбийлар ўртасидаги мусобақа ташкил этилди. Унда овчилар ва ҳарбийлар узоқ масофадаги ҳаракатсиз ва ҳаракатдаги нишонларга ов қуролларидан ўт очиш бўйича баҳслашди.
Изоҳ (0)