Қамчиқ довонида Фавқулодда вазиятлар вазирлиги ва Ички ишлар вазирлиги Йўл ҳаракати хавфсизлиги бош бошқармасининг куч ва воситалари томонидан автотранспорт воситаларининг ҳаракати вақтинчалик тўхтатилди. Бу ҳақда ФВВ матбуот хизмати хабар берди.
Гидрометеоролигия хизмати марказининиг берган маълумотига кўра, 28 ноябрь куни А-373 Тошкент—Ўш автомобиль йўлида қор кўчкиси хавфи юзага келиши мумкин.
Таъкидланишича, Тошкент вилоятининг Оҳангарон ва Ангрен шаҳарлари ҳамда Наманган вилоятининг Поп туманида автотранспорт ҳайдовчилари ва йўловчиларни қабул қилиш бўйича барча зарур чора-тадбирлар амалга оширилмоқда.
Қамчиқ довонидан ўтишга улгурмаган автотранспорт ҳайдовчилари ва йўловчиларни Тошкент вилоятининг Оҳангарон ва Ангрен шаҳарлари ҳамда Наманган вилоятининг Поп туманидаги мавжуд умумовқатланиш шохобчаларида исиниш учун вақтинча жойлашиб туриш тавсия этилади.
«Қор қатлами йиғиладиган жойлар ҳолати мустаҳкам эмас, қора кўчиши хавфи мавжуд. Қамчиқ довони бўйича қўшимча маълумотлар кун давомида бериб борилади», — дейилади хабарда.
Аввалроқ Ўзбекистон Гидрометеорология маркази 28 ноябрь куни кутилаётган об-ҳаво маълумотини эълон қилиб, Республиканинг тоғли ҳудудларига қор ёғиши кутилаётганини маълум қилган.
Изоҳ (0)