Хоразм вилоятида 2020 йил 25 ноябрь куни Янгиариқ тумани ҳудудидан ўтган Янгиариқ – Урганч 4Р-157 автомобиль йўлининг 16-километрида Nexia ҳамда Howo тўқнашган. Бу ҳақда ЙҲХББ ахборот хизмати хабар қилди.
Хабарда қайд этилишича, 51 ёшли ҳайдовчи бошқарувидаги Nexia 29 ёшли бошқа бир ҳайдовчи бошқарувидаги Howo’га урилган. ЙТҲ оқибатида Nexia ҳайдовчиси оғир тан жароҳати олиб, воқеа жойида ҳалок бўлган.
Шунингдек, машина ичида бўлган 14 ёшли йўловчи тан жароҳати олиб, Янгиариқ туман тиббиёт бирлашмасига қарашли шифохонага ётқизилган.
Хоразм вилояти ИИБ ЙҲХБ бошлиғи Шавкат Бойҳузуровнинг сўзларига кўра, йўл-транспорт ҳодисасининг содир этилишига Howo ҳайдовчисининг Nexia’га йўл бермаганлиги сабаб бўлган. Ҳолат бўйича Янгиариқ туманида ИИБ тергов гуруҳи томонидан терговга қадар суриштирув ишлари олиб борилмоқда.
ЙТҲ содир бўлган ерда бевосита гувоҳ бўлган қурилиш корхонаси ишчиси Howo’нинг канал бўйидаги қурилишда банд бўлганлиги, Nexia ҳайдовчиси огоҳлантиришларга қарамай тезликни камайтирмасдан келиб, ушбу транспорт воситасига урилганлигини маълум қилган.
Қурилиш корхонаси раҳбари ҳам Howo’нинг ҳодиса содир бўлган куни канал бўйидаги қурилиш ишларида иштирок этганини тасдиқлаган.
Аввал Бухорода Lacetti йўлни кесиб ўтаётган ота-болани уриб кетгани, бола вафот этгани, отанинг аҳволи оғирлиги хабар қилинганди.
Изоҳ (0)