Xorazmda Nexia va Howo to‘qnashuvi oqibatida bir kishi halok bo‘ldi
Xorazm viloyatida 2020-yil 25-noyabr kuni Yangiariq tumani hududidan o‘tgan Yangiariq – Urganch 4R-157 avtomobil yo‘lining 16-kilometrida Nexia hamda Howo to‘qnashgan. Bu haqda YHXBB axborot xizmati xabar qildi.
Xabarda qayd etilishicha, 51 yoshli haydovchi boshqaruvidagi Nexia 29 yoshli boshqa bir haydovchi boshqaruvidagi Howo’ga urilgan. YTH oqibatida Nexia haydovchisi og‘ir tan jarohati olib, voqea joyida halok bo‘lgan.
Shuningdek, mashina ichida bo‘lgan 14 yoshli yo‘lovchi tan jarohati olib, Yangiariq tuman tibbiyot birlashmasiga qarashli shifoxonaga yotqizilgan.
Xorazm viloyati IIB YHXB boshlig‘i Shavkat Boyhuzurovning so‘zlariga ko‘ra, yo‘l-transport hodisasining sodir etilishiga Howo haydovchisining Nexia’ga yo‘l bermaganligi sabab bo‘lgan. Holat bo‘yicha Yangiariq tumanida IIB tergov guruhi tomonidan tergovga qadar surishtiruv ishlari olib borilmoqda.
YTH sodir bo‘lgan yerda bevosita guvoh bo‘lgan qurilish korxonasi ishchisi Howo’ning kanal bo‘yidagi qurilishda band bo‘lganligi, Nexia haydovchisi ogohlantirishlarga qaramay tezlikni kamaytirmasdan kelib, ushbu transport vositasiga urilganligini ma’lum qilgan.
Qurilish korxonasi rahbari ham Howo’ning hodisa sodir bo‘lgan kuni kanal bo‘yidagi qurilish ishlarida ishtirok etganini tasdiqlagan.
Avval Buxoroda Lacetti yo‘lni kesib o‘tayotgan ota-bolani urib ketgani, bola vafot etgani, otaning ahvoli og‘irligi xabar qilingandi.
Mavzuga doir: Komil Allamjonov 14 yil avval Xorazmda YTHga uchrab, bir o‘limdan qolgani haqida so‘zlab berdi
