Наманганда маҳаллий ва хориж олий таълим муассасаларида таҳсил олаётган 35 нафар талабанинг бир йиллик тўлов-шартнома пуллари тўлаб берилди. Бу ҳақда «Дарё» мухбири Азизбек Абдувалиев хабар бермоқда.

Фото: «Дарё»

Бунинг учун махсус ташкил этилган комиссия томонидан тиббиёт йўналишида ўқиётган талабалар саралаб олинди. Улар орасида Россиянинг Санкт-Петербург, Узоқ Шарқ, Волгоград, Воронеж, Смоленск, Иркутск тиббиёт университетлари, шунингдек, Тошкент тиббиёт академияси, Андижон ва Самарқанд тиббиёт институтларида таҳсил олаётган йигит-қизлар бор.

Фото: «Дарё»

«Олдинлари туманда раҳбар бўлиб ишлаганимда битта бинони таъмирлашга 50 миллион сўм ажратилиши учун йил давомида сарсон бўлганимни эслайман. Ҳозир хорижда ўқиётган бир талабамизнинг йиллик тўлов-шартнома пули учун деярли шунга яқин маблағ тўлаб беряпмиз. Давлат раҳбари ёшлар билан учрашувда иқтидорли йигит-қизларни рағбатлантириш бўйича берган кўрсатмалари бунга асос бўлиб хизмат қилди», — дейди вилоят ҳокими Шавкатжон Абдураззоқов.

Вилоят бюджетининг қўшимча даромадлари ҳисобидан бу мақсадлар учун жами 470 миллион сўм ажратилди. Ҳозирда танлов комиссияси яна 35 нафар наманганлик талабанинг ҳужжатларини ўрганмоқда. Улар орасида нафақат тиббиёт, балки вилоятда эҳтиёж юқори бўлган бошқа йўналишлар ҳам бор.

Фото: «Дарё»

Талабаларга тўлов-шартнома пуллари ажратилганини тасдиқловчи сертификатларни топшириш маросимида бош вазир ўринбосари Беҳзод Мусаев иштирок этди.