Moskva maktablarida ta’til tugagach yuqori sinf o‘quvchilari (6—11-sinf) 19-oktabrdan 1-noyabrgacha masofadan o‘qitishga o‘tkaziladi. Meduza’ning xabar berishicha, bu haqda Moskva meri Sergey Sobyanin ma’lum qildi.
Foto: “TASS”
Boshlang‘ich sinf o‘quvchilari esa ta’tildan so‘ng odatdagi ta’limga qaytadi. Ular uchun ta’til paytida to‘xtatib qo‘yilgan maktab o‘quvchilari transport kartasi blokdan chiqariladi.
Sobyaninning so‘zlariga ko‘ra, yuqori sinf o‘quvchilarining koronavirus bilan kasallanish xavfi yuqori bo‘lganligi sababli shunday chora ko‘rilmoqda. Hozirda Moskvada kasallangan bolalarning uchdan ikki qismi yuqori sinf o‘quvchilariga to‘g‘ri keladi.
Shuningdek, Sobyanin Moskva maktablarida o‘qitishning yangi formati — tyutorlik vaqtincha joriy etilishini ma’lum qilgan. U katta yoshdagi va surunkali kasalliklarga chalingan o‘qituvchilarni infeksiya xavfidan himoya qilish uchun mo‘ljallangan. Darslarni o‘tkazish uchun maktablarga pedagogika oliy o‘quv yurtlari talabalari va bitiruvchilari taklif etiladi. Ularni o‘qituvchilar masofaviy tarzda nazorat qilib boradi.
Mavzuga doir: Moskvada tibbiyot oliygohlari talabalari COVID-19’ga qarshi kurashish uchun yana kasalxonalarga chaqirildi
Shahar merining farmoyishi bilan 19-oktabrdan 1-noyabrgacha shaharda qo‘shimcha ta’lim muassasalari va bolalarning bo‘sh vaqtlarini mazmunli o‘tkazish tashkilotlari ham ishlamaydi.
Avvalroq Moskva meri Sergey Sobyanin shaharga pandemiya yana bostirib kirayotganini ma’lum qilgandi. U 9-oktabrda ortda qolayotgan haftada Moskvada koronavirusning tarqalishi bo‘yicha vaziyat umuman yengillashmaganini bildirgan. Shuningdek, u 12–18-oktabr kunlari bu borada hal qilinadigan oraliq bo‘lishini qayd etgan. Merning so‘zlariga ko‘ra, Moskva shahri ma’muriyati shaharni karantin uchun yopish tarafdori emas.
13-oktabr kuni Rossiyada COVID-19’ga chalinish va undan vafot etish holatlari bo‘yicha mutlaq rekord qayd etildi. Sutka davomida aniqlangan kasallanishlar soni bo‘yicha ham, koronavirusdan o‘limlar soni bo‘yicha ham Moskva birinchi o‘rinda. Bir oy ichida Moskvada kasallanish holatlari besh martadan ko‘proq o‘sdi. Kasalxonalarga eng og‘ir bemorlar yotqizilmoqda.
