Тошкент вилояти Зангиота туманида сув таъминотига ноқонуний уланган фуқарога жарима ёзмасликни айтиб улардан пора талаб қилган МЧЖ бош муҳандиси қўлга олинди, дея хабар бермоқда Бош прокуратура «Дарё»га.
Қайд этилишича, Бош прокуратура ҳузуридаги департаментнинг Зангиота туман бўлими томонидан тезкор тадбир ўтказилган.
Унда «Ўзсувтаъминот» таъсисчилигидаги «Мусаффо оби ҳаёт» МЧЖ (давлат улуши мавжуд корхона) бош муҳандиси Р.Н. Беруний кўчасидаги 12 та хонадонни ноқонуний сув таъминотига уланганлиги бўйича катта миқдорда жаримага тортмаслик ва ушбу ноқонуний уланишларни қонуний тартибда ҳужжатлаштириб бериш эвазига фуқаро Х.Х.дан 8 миллион сўм пора талаб қилган.
Мавзуга доир: Ўзбекистонда мансабдор шахс томонидан ноқонуний бойлик орттирганлик учун жиноий жавобгарлик белгилаш таклиф этилмоқда
Ҳолат юзасидан Р.Н.га нисбатан Жиноят кодексининг 210-моддаси 2-қисми (пора олиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Самарқанддан Термизга элтиб қўйиш эвазига йўловчидан 1400 рубль талаб қилган поезд кузатувчиси, Сирдарёда фуқарони Чимкентдаги университетга 2700 доллар эвазига ўқишга киритиб қўйишни ваъда қилган шахс ҳамда Наманганда МИБ туман бўлими бошлиғи ўринбосари 2 минг доллар пора билан қўлга олингани ҳақида хабар берилганди.
Изоҳ (0)