Россиянинг коронавирусга қарши «Sputnik V» вакцинаси нархи маълум қилинди. У россияликлар учун бепул бўлади

Россияда яратилган коронавирусга қарши «Спутник V» вакцинасининг иккита дозаси нархи халқаро бозор учун, тахминан, 20 долларни ташкил қилади, россияликлар учун вакцина бепул бўлади. Бу ҳақда Россия тўғридан-тўғри инвестициялар жамғармаси томонидан маълум қилинди, деб ёзмоқда «Korrespondent.net».

«Россиянинг ‘Спутник V’ вакцинасининг халқаро бозорлар учун нархи 2021 йил февраль ойидан бошлаб ҳар бир доза учун 10 доллардан кам бўлади, бу битта одамни эмлаш учун зарур бўлган икки дозанинг нархи 20 доллардан кам бўлишини билдиради. Шундай қилиб, ‘Спутник V’ унга ўхшаш самарадорлик кўрсаткичларига эга mRNA технологиясига асосланган хорижий вакциналарга қараганда икки ёки ундан кўп марта арзонроқ бўлади. ‘Спутник V’ билан эмлаш россияликлар учун бепул бўлади», — дейилади жамғарма хабарида.

Таъкидланишича, беморнинг иккинчи дозани қабул қилиш шарти билан вакцинанинг биринчи дозаси қабул қилинганидан кейин 42-куни эмлаш самарадорлиги 95 фоиздан ошади.

«Таҳлилларга кўра, ‘Спутник V’нинг биринчи дозасини олганидан кейин 28-кун (иккинчи доза қилинганидан кейинги 7-кун) самарадорлик 91,4 фоизни ташкил этди. Биринчи дозадан кейинги 42-кунда кўнгиллилар тўғрисида дастлабки маълумотлар (иккинчи дозадан кейинги 21-кунга тўғри келади), кўнгиллиларда барқарор иммунитет шакллантирган бўлса, эмлаш самарадорлигини 95 фоиздан юқори эканлигини кўрсатган», — дейилади хабарда.

Шунингдек, 2021 йилда хорижда 500 миллион киши учун 1 миллиард дозада «Спутник V» вакцинаси ишлаб чиқарилиши ҳақида хабар берилган.

Қайд этилишича, Россия тўғридан-тўғри инвестициялар жамғармаси ҳозирда бир қатор мамлакатлар ва компаниялар томонидан ишлаб чиқариш қувватларини янада ошириш бўйича қўшимча мурожаатларни кўриб чиқмоқда.

Россия вакцинасининг халқаро бозорга биринчи етказиб берилиши 2021 йилнинг январида кутилмоқда.

Аввалроқ «Спутник V» вакцинасининг яратувчилари унинг самарадорлигини 92 фоизга баҳолаганди.

Маълумот учун, АҚШнинг Pfizer компанияси томонидан яратилган вакцинанинг дозаси АҚШ учун 19,5 долларни ташкил этади (иккала компонентнинг қабул қилиниши 39 долларга тушади), бошқа бир Америка компанияси Moderna вакцинасининг бир дозаси нархи эса 25-37 долларни ташкил қилади.

Эслатиб ўтамиз, АҚШнинг Pfizer компанияси Германиянинг BioNTech компанияси билан биргаликда ишлаб чиқарилган COVID-19’га қарши вакцинанинг самарадорлиги 95 фоизни ташкил этишини маълум қилганди. Компания маълумотларига кўра, вакцина синовда қатнашаётган кишининг ёши, ирқи ва миллатидан қатъи назар, самарали бўлган. Дастлабки синов натижалари 90 фоиз самарадорликни кўрсатган. Шунингдек, ноябрь ойида Американинг Moderna компанияси ўзининг янги коронавирусга қарши вакцинаси синовларнинг учинчи босқичида 94,5 фоиз самарадорлик кўрсатгани ҳақида хабар берганди. Буюк Британиянинг AstraZeneca компанияси вакцинасининг ўртача самарадорлиги 70 фоизни ташкил қилган.